Kua rewa te kiriata 'I Te Pō' nā Rob Ruha

Leah Te Whata

Ko te ihorei i te ao waiata Māori, ko Rob Ruha tērā i whakarewa i te kiriata hōu mō tāna waiata 'I Te Pō'. I Tāhiti whakaahuatia ai te kiriata, engari i rongonui kē te waiata i te kaponga tuatahi nā rōpu rangatahi, The Rū-Cru, i TiriAta.

He tangi apakura, he tuku roimata mō ngā matua o Rob Ruha.

Ko tā Ruha, "I titoa mō ērā tokorua kua riro, kua mate, hei awhi i au ki te tuku i a rāua tahi."

I Tāhiti whakaahuatia ai te kiriata, ko te wairua o te waiata ka kitea i te ori o Poemana Poe.

"Nā runga i te aroha o tērā tono whakaae atu ahau ana, koinā, nā te motu e kite ana i tēnei wā. Kei Hawaiki mātou i tēnei wā, koinei e whakaaro kia whakaahuangia, kia kiriatangia te waiata rā ki konei."

Nā te Rū-Cru te waiata i rongonui ai, neke atu i te waru rau mano ngā tāngata kua mātaki i te whitiāhua tuatahi.

"Nā te rōreka o ngā reo a ngā rangatahi, anā, ko aua rangatahi rā kei runga i taku kōpae e waiata ana i te waiata rā nā reira kei korā tonu tā rātou wairua, kei roto tonu i te waiata rā."

Ko Kaaterama Pou tētahi o ngā kaiwaiata i poipoia e Rob Ruha. Ākuanei tāna kōpae tuatahi ka rewa, ā, ko ngā reo o Te Reanga Mōrehu o Ratana ka rangona.

"Tino rawe tērā kaupapa, tino rawe te noho tahi me tērā o ngā kapa."

Hei te Whiringa-ā-Rangi rewa ai te kōpae.