Kua hinga a William Gugi Waaka he pou nō te whare tapere Māori

Wikitōria Day

He pou nō te whare tapere Māori ka hinga nei. Nō te Rāhoroi kua hipa, mate atu ai a William Gugi Waaka nā ētahi raruraru i pā ki tōna manawa. He whitu tekau mā ono tau tōna pakeke.

Hei tā Hemana Waaka ō Ngāi Tūhoe, Ngāti Pūkeko, "Kore rawa tētahi tangata e eke ki te mātauranga kei a ia.I whānau mai tēnei tangata i roto i te whakangahau.”

“Ko ngā pūkenga me ngā mātauranga i moea e ia, kai ai ia, whakangahauhia ia, whakahikohia e ia, te tangitangi o tēnei mea te whakangahau."

Ko te waitī o te tangi o tana rakuraku tērā i pāorooro ki ngā whaitua huhua o te ao. Nō ngā tau o te ono tekau tīmata ai ngā mahi whakangahau a Gugi Waaka ki ngā hōro kanikani o Tāmaki Makaurau, ā, mai taua wā, i kitea ai te tini o āna pūkenga waiata, rakuraku hoki.

E whakaponotia ana ka kore anō tātau e kite i tētahi momo kaiwhakangahau pēnei i a ia a ngā rā kei tua.

A te pō nei ka karapotihia ia e ōna hoa ngahau o mua.  Hei āpopō rā anō, kawea atu a ia ki te urupā kei Orākei Marae, ki reira ia tāoki ai ki te taha o tana tamāhine.