Ngā kaupapa: Employment, Environment

Ko ngā mahi ngahere tētahi o ngā ahumahi mōrearea rawa o Aotearoa tā tētahi pūrongo motuhake

"E tika ana, kia hoki ora te tangata ki te kāinga!"  Koinei ngā kupu taunaki ki roto i te pūrongo motuhake mō te kaitiakitanga o ngā kaimahi ngahere i puta i te rā nei.

Ko tā te kāhui motuhake whakatau, koinei tētahi o ngā ahumahi mōrearea rawa i Aotearoa, nā runga i te nui o ngā tangata kua mate, kua whara rānei i te wā e mahi ana rātou.

Koinei te tuatoru o ngā kaupapa hiki ōhanga o Aotearoa, te mahi ngāherehere, tekau piriona tāra te hua ka puta ia tau, rua tekau mano tāngata e whai tūranga mahi.

Heoi, koinei hoki tētahi o ngā wāhi mahi mōrearea, iwa rau, ono tekau mā whitu ngā tangata kua whara kikino ki roto i tēnei mahi, rua tekau mā waru te hunga kua mate ki waenga i te tau rua mano mā waru me te tau rua mano tekau ma toru.

I te tau ka huri, tekau ngā tangata i mate ki roto i ngā mahi ngāherehere.  I ruku hōhonu te pūrongo motuhake i ngā take aitua, mate me te whakahau he nui ake ngā aitua kei tēnei tūnga mahi ki tētahi atu.

I whakarārangi mai te kāhui whakawā i ētahi tikanga whakaaro kia pai te taha tiaki, engari me whānui te titiro mō te kaitiakitanga o ngā kaimahi, kāua noa tērā ahua e taka iho ki ngā kaiwhakahaere anake.

Ko te whakapātari i ngā āhuatanga mahi me te roa o ngā haora mahi ētahi o ngā take nui kei muri i ngā aituā, nā te āki a ngā uniana mahi kia pai ngā whakahaerenga.

Ko tā te kāhui whakawā, ehara tēnei i te whiu hē, engari me aro ki te hiki i te hauora me te kaitiakitanga.  Ko tā ratou hiahia, kia whakatū i tētahi poari arotake i ngā tohu mātauranga me te manako ia he huarahi ka puta hei whakaiti i ngā wharanga me ngā aituā i roto i ngā tau e rima e tū mai nei.