Kei te puku te rae o Te Ururoa Flavell, ā, ko ngā kai-rēti whare tūmataiti te take

Kei te puku te rae o te Minita Whanaketanga Māori, o Te Ururoa Flavell, ā, ko ngā kai-rēti whare tūmataiti te take.

I te Waipounamu te Minita i tēnei wiki ki te tirotiro haere i ētahi whare e nōhia ana e ngā whānau Māori, ā, hei tāna kātahi rā te āhua kanukanu, weriweri ko reira.

Ko te whakaaro tuatahi a te minita ki te whakaīngoa i ngā kaireti whare nā rātou ēnei whare kanukanu kia patua rātou e te whakamā, heoi, ko te mataku kei panaia ngā kainoho i ēnā whare ā koia te āhuatanga mō te tokomaha o ngā whānau kei Ōtautahi ki te amuamu rātou kei panaia i o rātou kainga kei hikina rānei ngā reti.

Nōreira, e whāia ana e te Minita ētahi atu huarahi e whai rongoa ai tēnei raru.

Ko Ngatokowaru Marae te whakaruruhau mō te Pāti Māori i tēnei rā, he whare rerekē rawa ki ngā kainga karukaru e nōhia ana e etahi i Ōtautahi.

Ki tā Te Ururoa Flavell, “Ko te mea tino ngau nei i toku ngākau ko te rongo i ngā kōrero a tētahi whaea, tokotoru, tokowhā rānei ana tamariki, engari kei reira tonu te kiore me ngā manu o roto tonu i te whare me tana whakapā atu ki te tanagata nāna anō rā tērā whare i tuku ki a ia ara te agent me tana kore aro mai ki ana take.”

Nā te Pāti Māori te kaupapa "Warrant of Fittness" mō ngā whare papori i kōkiri, ko te hiahia kia whakawhānuitia tēnā ki ngā kainga tumataiti hoki.  Kua kōrero a Te Ururoa Flavell ki te Minita Take Pūtea kia whai āwhina.

Hei tā Te Ururoa Flavell, “Ko tētahi o ngā whānau ana kua kōkirihia o rātou take ki mua i te aroaro o te tangata nōna te whare, ko tana whakautu ki tēnā kua panaia rātou i tēnā whare. Ki te hiahia rātou ki te noho i tērā whare kua piki te utu mā te kotahi rau tara, koina te mahi a ētahi o ēnei nanakia.”

E ai ki a Kahureremoa Aki, “Kōrero atu ki a rātou mō o amuamu, mō o tika, mō o mana mēna kaore e taea kei konei mātou huri noa i te motu.”

He roia a Kahu Ariki e mōhio ana ki ngā take reti whare. Hei tāna he maha ngā ara whai āwhina mā te tangata, ā, inanahi i whakarewaina e te minita whare e Nick Smith tētahi whārangi ipurangi mō tēnei take.

Ki tā Aki, “Ka tukuna atu he reta ka kōrero rānei mātou ki ngā landlords kia whakatikaina te āhuatanga o ngā whare.”

Ko te māharahara nui a te minita ko ngā tamariki e noho ana ki ēnei kainga, mātua rā i te hotoke e whakatata mai ana.

E ai ki a Te Ururoa Flavell, “I rongo ake ngā taringa ki ētahi o ngā taumaha pēnei o ēnei i roto i Ōtautahi engari kia tae a tinana nei me te kite a kanohi nei i te āhua noho a ētahi ka tangi ake, whanau maori e korero nei me ngā tamariki, ko te wahine kotahi me ngā tamariki.

Kei te hiahia a Te Ururoa Flavell ki te hoki atu ki Ōtautahi ki te hui tahi me te koromatua me Lianne Dalziel, ki te whakarite i tētahi māhere anga whakamua.