Ngā kaupapa: Entertainment, NZ Music

Kei te pāohotia ngā tikanga Māori ki te papa ngahau auraki

Te Kuru o te Marama Dewes

Kei te whai a Ria Hall kia whakatinanatia ngā tikanga Māori i roto i wāna nei mahi ngahau. Nāna te taiopenga Splore i whakatūwhera ki te Tāpapakanga-ā-Puku, me te aha, he hanga Māori nei te tū.

“Kei konei ahau ki te whakakanohi i a tātau te iwi Māori tuatahi ake. Te whakakanohi i a tātau te iwi Māori, i ōku iwi, ōku moana, ōku hapū ōku whānau, ōku marae maha. Tuarua, ka tū ahau hei tauira mō Ngāi Wāhine mā.”

Hei tā Ria Hall he mea nui te whakaputa waiata Māori kia rongo te hunga tūmatanui, arā, “Ki a au nei, he kaupapa kia kohikohi i wā tātau ake waiata ki waenganui, mā konā ka puare ake ki te hunga e whakarongo mai ana e mātakitaki mai ana i a mātau e ngahau ana.”

Nō te tau kua hipa puta ai tana kōpae Rules of Engagement, ka eke ki te taumata tiketike o ngā kōpae waiata ‘40 ō runga’ ki Aotearoa. Kua rarangahia ngā kōrero pakanga mō Pukehina me Te Ranga, ka mutu, ko te reo hoki tērā o Turirangi Te Kani o Ngāi Te Rangi me Te Whānau a Apanui, he pāpā koroua ki a ia.

I a ia e whakamārama i ngā korero o tōna tipuna ko tā Ria Halll, “Ko ia tetahi o ngā tangata i whakatakoto te mauri te wero ki a tatau katoa. Mā wai e hikina tero wero? Well, mā tātau.”

Nō te kāenga tonu ōna tino tauira.

Hei tāna, “Ko ngā kaiwaiata ko Betty-Anne Monga, ko Annie Crummer me aku hoa Hollie Smith, Maisey RIka, Rob Ruha rātau katoa i para i tēnei huarahi ki te ao pūoro.”

Ko tōna wawata ka whakatōkia ana kōrero ki roto i te ngākau o te tangata, kia mau, kia ū, kia ita.