Kei roto i te reo Māori, ko te pukapuka tamariki "Alice in Wonderland"

Kei roto i te reo Māori, ko te pukapuka tamariki, “Alice in Wonderland” nā Lewis Carroll, he mea whakamāori e tētahi mātanga mātauranga Māori hei whakanui i te kotahi rau, e rima tekau tau o te pukapuka rongonui nei.

Hei tā Roa, “Ka panuitia e au ki taku mokopuna e whitu ana tau. Katahi taku mokopuna ka pakaru mai te kata, me te mea mai ki ahau 'Koro he porangi, he porangi katoa te (wahine), he aha hoki”.”

I tuhia i te tau 1865 e te kaituhi Ingarihi a Lewis Carroll, e hia kē nei ngā momo rerekē kua tāngia, ā, kua puta hoki ki ngā whare pikitia, engari ko te pūrakau ko taua pūrakau tonu rā.

Ka hoki ngā mahara o Aurere Thatcher rāua ko Kahuripene Kawe, tauira nō Te Whare Wānanga o Waikato ki a rātou e tamariki tonu ana.

Hei tā Kawe, “Mahara ana au i te wā tamariki ana au, i pānui au i tēnei pukapuka i ngā wā katoa, engari ināianei kei roto i te reo Māori, miharo.”

E hāere ana a Tom ki New York a te pō nei ki te hui 'Alice One Fifty' ki reira hui tahi ai me ngā kaiwhakamāori o te ao me a rātou pukapuka.