TV show sub navigation

Ngā wāhanga

Ngā wāhanga katoa mō Huia Rau.

1: Rātapu, 29 o Haratua, 6.00 i te pō
Whero o te Rangi Bailey - Nō Taranaki, Te Atiawa, Ngāti Mutunga ia.

Ka toro atu a Te Poihi ki te kāinga o kui Whero Bailey i Otaraua, kei uta rawa o Waitara. Ka  kōrero  rāua mō te papakāinga o Parihaka i te wā e noho tamariki ana a ia, ā, ka whakaari mai a ia mō tōna ngākau nui ki te tuhi kōrero pūrakau me tana mahi rāranga.


2: Rātapu, 05 o Pipiri, 6.00 i te pō
Mahara Okeroa - Nō Taranaki nui tonu ia.


He puawai nō Parihaka a Mahara Okeroa i whai wāhi ai ki te ao tōrangapū o Aotearoa. Ka kōrero a ia mō ōna mātua e kaha whakakatenatena ana i a ia ki te whai haere i te ao tōrangapū hei kimi rongoa mō ngāi Māori e tami ana i te pouritanga. Ka puea ake ōna whakaaro mō te pūtake ki te pupuri tonu i ngā kōrero o nehe, ngā waiata tawhito me te reo o Taranaki.


3: Rātapu, 12 o Pipiri, 6.00 i te pō
Mahau Waru - Nō Te Atiawa me Taranaki ia

 
Ka kōrero a Mahau Waru mō te wā e tupu ake ana a ia i waenga i ōna whanaunga ki te taha o te awa o Waiongana. Ka  whakamārama mai ia i āna mahi ki roto o Te Taitokerau. Ka kōrerotia te take i hoki mai a ia ki Taranaki mahi ai ki roto i ngā rōpu hauora hei kaumatua mō te hapori Māori.


4: Rātapu, 19 o Pipiri, 6.00 i te pō
Mere (Mary) Berry - Nō Ngāruahine ia.


Noho tahi ana a Te Poihi me Mere Berry ki roto i tōna kāinga tonu ki Te Hāwera korero ai. Ka kōrero ia mō tōna whakapapa me tana whakatipu i raro i ngā rekereke o ōna pahake (kaumātua/kuia). Ka whakamārama a ia i tōna ū auroatanga ki te hāhi me tōna ngākaunui ki te kōrero i roto i tōna reo tūturu o Ngāruahine.


5: Rātapu, 26 o Pipiri, 6.00 i te pō
Rangikōtuku Rukuwai - Nō Taranaki me Te Atiawa ia.


Haere atu a Te Poihi ki te whare o Rangikōtuku ki Ngāmotu. Ka kōrero a ia mō tōna hononga ki Parihaka. Whārikihia mai rā ōna pūmahara e pā ana ki āna mahi ki roto ki ngā wheketere mīraka, i āna mahi whakahaere pāparakauta me ōna moemoea mō āna mokopuna.


6: Rātapu, 03 o Hōngongoi, 6.00 i te pō
Pukepuke Tangiora Avery - Nō Ngāti Ruanui ia.


Hou atu rā a Te Poihi ki te whare o Pukepuke Tangiora Avery ki Te Hāwera noho tahi ai ki te kōrero. Ka āta whārikihia mai ōna mātauranga whakapapa. Ka whakamārama mai i āna mahi manaaki tangata hāpai ai ngā hapori Māori ki Taumarunui me Taranaki.


7: Rātapu, 10 o Hōngongoi, 6.00 i te pō
Marina Hineara Parata - Nō Ngāti Ruanui me Ngāruahine ia.


He pouako kui nō roto mai o Te Ataarangi a Hineara. Ka kōrero a ia mō tōna whakatipu i a ia e tamariki ana ki Ngārongo Pā, Ketemarae i raro i ngā panekoti o ngā tino kuia o te marae. Ka kōrero hoki a ia   mō āna mahi ki te whāngai atu i te reo Māori ki te iwi whānui o Taranaki.


8: Rātapu, 17 o Hōngongoi, 6.00 i te pō
Hēnare Ngāia - Nō Ngāti Ruanui ia.

Noho tahi ana a Te  Poihi  me  Hēnare Ngāia ki tōna kāinga i Matariki (Normanby). Ka kōrero  a mō tōna hononga ki Te Taitokerau me Taranaki. Ka whākina mai e ia tētehi kōrero mō Tonga Awhikau. He kaumatua pūreirei puna­‐kī a Tonga Awhikau i Ngarongo, Ketemarae i tōna wā.


9: Rātapu, 24 Hōngongoi, 6.00 i te pō
Hēnare Ngāia - Nō Ngāti Ruanui ia.


Whakapoapoa mai a Te Poihi i ngā kōrero a Hēnare Ngāia. Ka kōrero mai a Hēnare mō āna mahi  ki kāreti Māori tonu a Hato Paora me tōna ngākaunui ki te waiata i ngā waiata aroha.


10: Rātapu, 31 o Hōngongoi, 6.00 i te pō
Tiki tu te Rangi Raumati - Nō Ngāti Mutunga, Te Atiawa, Kahungunu ia.
   
Ka haere atu a Te Poihi ki te whare o Tiki Raumati ki Urenui, ki Taranaki ki te raki. Ka whakaari mai rā a Tiki i ōna mātauranga whakapapa me ōna mātauranga tikanga. Ka whakamāmama a ia i āna mahi ki roto ki te hāhi Mihingāre ki ngā takiwā katoa o Aotearoa.


11: Rātapu, 07 o Hereturikōkā, 6.00 i te pō
Hinewaitō Bigham - Nō Ngāruahine ia.

Ka haere atu a Te Poihi ki te rohe o Ngāruahine kōrero ai me Hinewaitō Bigham. Ka kōrero a Hinewaitō mō te hiranga o ngā awa i tōna takiwā me tōna pūmahara i te wā e noho tahi ana a ia me ōna mātua ki Waiokura Marae.


12: Rātpu, 14 o Hereturikōkā, 6.00 i te pō
Tūrangapito (Sandy) Parata - Nō Ngāti Ruanui ia.
 
Ka kōrero a Tūrangapito mō ōna pūkenga i roto i te ao hākinakina i a ia e tamariki ana. Ka whakapūaki i tōna miharo ki āna tamariki mokopuna e whai wāhi nei ki roto ki ngā kapa whutupōro, ā, netepōro anō hoki o Aotearoa i ēnei rangi. Ka kōrero a ia mō tōna kaha tautoko ki ngā kaupapa e whai koha nei ki te iwi o Ngāti Ruanui.


13: Rātapu, 21 o Hereturikōkā, 6.00 i te pō
Ihaka Robinson - Nō Taranaki me Te Arawa ia.

Ka toro atu a Te Poihi ki te kāinga o Ihaka Robinson ki Matariki (Normanby). Ka korero whakapapa a ia, ā, ka whakapūaki i ōna pūmahara i te wā e noho ana a ia ki Te Arawa me tōna ngākau nui ki te ao whutupōro.