Kaupapa: Elections

Tokorua o ngā mema pāremata Māori kua tae waewae tapu atu ki Pāremata

Mai i te kāhui Māori tokoiwa o te Rōpū Nāhinara, tokorua o rātou kua tae waewae tapu atu ki te Ana o ngā Raiona.  Ka mutu, hei tā te tokorua, ko te aronga matua o ā rātou mahi tuatahi ki Pāremata, he kawe i ngā kaupapa o ō rātou wā kainga.

Ahakoa kei te tūranga rima tekau o te Rōpū Nāhinara tēnei uri Māori e noho ana, hei tā Tutehounuku, e ngākau titikaha ana ia, ka whai tūranga tonu ia ki Pāremata a te putanga o ngā hua motuhake o te Kōwhiringa Pōti.

Mai i ngā uri tokoiwa Māori o Nāhinara, ko Tākuta Shane Reti rāua ko Tutehounuku Korako ngā waewae tapu o te tira.

Ko Reti tērā i toa i te tūru auraki o Whangarei, ā, hei tā te uri o Ngāti Wai, o Tainui hoki, e tūmanako ana ia kia hanga mai i ngā tūranga mahi toru mano ki roto i te rohe o Te Tai Tokerau, mā roto i ngā kaupapa hanga huarahi o Nāhinara me te hāpai i te whakatatūtanga o ngā kerēme tiriti o te Raki.

Ka mutu, ahakoa kīhai i toa i a Tūtehounuku te rohe auraki o Ōtautahi, a Port Hills, koia tērā e wawata ana kia kawe tonu i ngā mahi whakatikatika ki Ōtautahi, mātua rā te whakatika i ngā kura o tōnā rohe pōti.

Ko te whakatūnga o Tākuta Shane Reti hei mema pāremata e whai ana i āna mahi nui hei rata, ā, ko Tutehounuku Korako he kaipakihi tūruhi, he mema hoki kua whai reo ki te poari kāwanatanga, pakihi hoki o tōnā iwi o Ngāi Tahu.