Ngā kaupapa: Elections, Politics

Tērā tonu pea ka heke a Cunkliffe i tana tūranga

Heeni Brown

E huna ana a Cunliffe i te hunga pāpāho, engari e kore e āhei te huna i ngā kōrero e rerere ana i te Whare Mīere, ā, ko te wairua e rangona ana i te wā, horekau he aha ki te pātai, pēnā rānei ka turaki a Cunliffe, ko te mea kē ko te taima ka turaki a ia i tōna tūranga kaiārahi.

Heoi anō, i tahuri atu a Te Kāea ki te rūnanga Māori o Reipa, ki te aromatawai pēnā rānei e tautoko tonu ana rātou i a Tīma Cunliffe.

I horo tā Kelvin Davis tahuri i ngā whārangi e kōrero ana mō te rangatiratanga o tōna pāti, engari horekau he aha ki a ia ko wai raini te tumuaki mōna.

Ko te āwangawanga kē ko te pupuri ki te pōti Māori, ā, ko ngā kupu a Cunliffe e mau tonu nei ki te mahara, kia tepara ai ko ngā ngutu o āna mema.

Ahakoa horekau e āhei ana ngā mema ki te kōrero mō te take, e whakaae ana ngā mema pēnei i a Meka Whaitiri rāua ko Louisa Wall, me aro pū ki te take, he aha i hinga mārika ai a Reipa.

Horekau mātou i whai wāhi ki te kōrero ki a Nanaia Mahuta, te kaiārahi o te rūnanga Māori pēnā he kōrero āna ki te take.

Engari, ko ngā kupu a tōna hoa mahi a Kelvin Davis, ahakoa ngā raruraru o te rōpū, e pakari ana te whare Māori o Reipa.

E ai ki a Kelvin Davis, “E pai ana te whanaungatanga ki waenganui i a mātou tō mātou hiahia kia mahi ngātahi mō te iwi Māori kia kōrero mō te iwi Māori kia tū hei rōpū māngai mō te iwi Māori.”

I tukua te pātai ki ngā mema Māori o Reipa, pēnā ka tae mai te wā, ka tuku ko ō rātou tono hei kaiārahi.

Engari ko te whakahoki i te wā nei, he whakapakari anō i tō rātou tū ki ngā tūru Māori kia kaua rā e riro atu anō.