Kaupapa: Politics

Te whakapaunga pūtea ā ngā mema paremata Māori

E toru marama ā e toru miriona taara neke atu te rahi o ngā nama a o tātou mema paremata.  Koina te kitenga i ngā whakaputanga whika i te rangi nei mō te wāhanga tau Oketopa ki te Tihema.  Ā, e ai ki te pūrongo a tā mātou māngai tōrangapū, a Maiki Sherman, ko ngā kaiārahi o te Pāti Māori kei te tihi o te maunga.

He tūranga Minita te whiwhi ā ngā kaiārahi o te Pāti Māori i tā rātou hononga ki te kāwanatanga, ā, te āhua nei e kore rāua mō te moumou.

E ai ki nga whika whakapaunga putea a nga mema paremata, mo nga nama ki Aotearoa nei, ko Pita Sharples raua ko Tariana Turia kei te tokotoru o runga, i te taha o te Pirimia.

Koinei ngā whika i puta i te rangi nei mō ngā marama e toru i te paunga o tērā tau.  Ā, ahakoa ko Pita Sharples kei te tūranga tuarua, he pai ake ki ērā o mua.  Mai i te marama o Hurae ki Hepetema, he nui ake āna nama ki ērā o te Pirimia.  Ā, ko taua āhua anō rā mō te wāhanga o Aperira ki Hune.

Mo etahi atu o nga mema Maori peera i a Hekia Parata, eera o Reipa, ratou ko Te Ururoa Flavell me Hone Harawira, kei te takiwa o te rua tekau ki te wha tekau mano taara ia toru marama te nama. Kaati, me matua maumahara, ko tetahi take e pena ana na te takiwa me te rahi o a ratou rohe pooti.

Ki te tauora o te rārangi tatau, ko Holly Walker o te Rōpū Kākāriki te ihupuku o ngā mema me tana nama wha mano taara.  Katoa katoa mō ngā marama e toru ki te Tihema o tērā tau, tata ki te toru me te haurua miriona te whakapaunga a o tātou mema paremata.

Kairīpoata:  Maiki Sherman