Kaupapa: Kōhanga Reo

Te Pātaka Ōhanga board member dismissed

Kua panaia atu tētahi mema poari o Te Pātaka Ōhanga, arā, te kamupene tūmataiti a Te Poari Matua o Te Kōhanga Reo, i tana tūranga. Ko Druis Barrett tētahi o ngā mema tokotoru o te poari o Te Pātaka Ōhanga, ā, e ai ki ngā whakamahuki kua tae mai ki Te Kāea, i panaia ia i taua nohoanga i ngā wiki tata nei.

Kāti, hei te paunga o tēnei marama tonu e whakaponotia ana ka puta te pūrongo arotake ōtita nei i Te Pātaka Ōhanga, he mea kōkiri e te Manatū Mātauranga ao ake i ngā whakapae e raweke pūtea ana te toihau ō-mua, a Lynda Tāwhiwhirangi.

Kāre tonu i te mārama nā te aha i panaia ai a Druis Barrett i tana tūranga i runga i te poari o Te Pātaka Ōhanga, ā, kua whakapau kaha tā mātou kaikawe kōrero tōrangapū a Maiki Sherman ki te whakapaa atu ki a ia nō nā tata nei, engari auare ake. Hēoi, i kōrero ā-waea ake ia ki ngā heamana takirua o te poari matua, arā ki a Timoti Karetu rāua ko Tina Ratana-Olsen, engari hei tā rāua karekau te poari matua mō te kōrero ki a Whakaata Māori. Kāti, kāore hoki e oti i reira, e ai ki ngā whakamārama kei te rapua taua tūranga wātea e Tukoroirangi Morgan, te mema hou katahi anō nei ka tohua ki te poari matua.

Ko Druis Barrett anake te mema poari o Te Pātaka Ōhanga i tatū mai ki te whare pāremata mō te hui me ngā minita, ko ia hoki i whai wāhi atu ki te kōkiritanga o te arotake o te kōhanga reo mō ngā whakapae raweke pūtea. Hēoi, inā tata nei i panaia ia i tana tūranga mema poari, ā, tūturu e rere ana ngā pātai.

Hei tā tētahi māngai mō ngā kōhanga reo o Mātaatua me Tauranga Moana, tā Lorraine Hail he “tokowhā rātou o te poari i runga i tērā āhua. Kei te aha ētahi atu? Kei te aroha atu au ki a Druis mō tērā. Kāre anō au kia rongo mō tērā āhuatanga. Katahi tonu nei au ka rongo i tērā kōrero.”

Ko ngā tikanga whakahaere o te poari matua te pūtake o ngā wero a te kāhui kōhanga reo o Mātaatua/Tauranga Moana. He kaupapa i kawea pū e rātou ki te taumata o runga, mātua rā ko te poronga tūranga me te tohu mema ki te poari matua ngā take. Nā whai anō kua puku te rae i te rongo kua tohua a Tukoroirangi Morgan hei mema hou ki te poari matua.

Hei tā Lorraine anō, “koirā tētahi o ngā wero ki te poari i tērā tau mō te āhuatanga mō te whakaeke tāngata ki aua tūnga rā. Nōreira mēnā kua whai tūnga ia, kei te āhua ohorere tēnā.”

Ko Tukoroirangi Morgan te māngai mō Kīngi Tūheitia i runga i te poari matua i tērā tau. Hēoi, nō te marama o Tīhema ka mana ko tōna noho hei mema motuhake. E ai ki ngā whakamārama, kei te whai inaianei a Morgan i tētahi tūnga ki te poari a Te Pātaka Ōhanga.

Ko te āwangawanga nui a te māngai mō ngā kōhanga reo o Mātaatua me Tauranga Moana, hei ko taana “kāre anō te poari kia tuku pānui mai ki ngā whānau katoa. Tērā pea kua tuku ki ētahi kōhanga o te motu, engari ngā kōhanga o roto i a Mātaatua me Tauranga Moana, kāre anō mātou kia whiwhi pānui me tētahi paku whakamārama kei te aha te poari”

Kāti, ahakoa kua whakawāteahia a Druis Barrett i tana tūranga me Te Pātaka Ōhanga, ko ia tonu tētahi o ngā mema o te poari matua. Nōreira, tuia tēnā ki te wahangū o ngā heamana takirua, ā, e kore pea e puta te kiko o te whakatau mō tōna pananga ināngeto nei.

E ai ki tā mātou kaikawe pūrongo tōrangapū, a Maiki Sherman, he maha tonu ngā pātai e iriiri tonu ana. Aua atu i te pananga o Druis Barrett, ko te arotake ake a te poari matua mō Te Pātaka Ōhanga - he aha āna kitenga, otirā ngā ara whakatika i ngā raru? Āpiti atu ko te taha ki ngā tikanga whakahaere kua werohia e Mātaatua/Tauranga Moana - ahea tēnā take e āta wherawherahia i waenga i ngā taha e rua - māna e tukuna atu e te poari matua hei kōrerotanga mā ngā kōhanga o te motu? E mōhiotia ana hei te paunga o tēnei marama ka whakaputa pūrongo ōtita te Manatū Mātauranga mō Te Pātaka Ōhanga, hēoi, ko te māharahara e kore pea aua take e whai wāhi ana ki tēnā.