Kaupapa: Water

Me tutuki tētahi whakaaetanga i waenganui i te Kaunihera Māori me te Kāhui Rangatira ā Iwi

Ko ngā taupatupatu i whakapae i waenga i te Kaunihera Māori o Aotearoa me te Kāhui Rangatira a Iwi ka whakamoea inā tutuki ai tētahi whakaaetanga e whakarārangi ana i te mana motuhake o ia rōpū. 

E ai ki te Kaunihera Māori karekau rāua ko te Kāhui Rangatira a Iwi i te whakataetae, engari kei tēnā kei tēnā tōna anō kawenga mō Ngāi Māori. 

I ngā tau tata nei kua pupū ake te rangirua mō te whai wāhi tahi a te Kāhui Rangatira ā-Iwi me te Kaunihera Māori ki ētahi kaupapa, pēnei me te mana o Ngāi Māori ki te wai.

E ai ki te heamana takirua o te Kaunihera, ki a Maanu Paul, nā tēnā kua āhei te Kāwanatanga ki te karo i a ia me te kōrero hāngai ki te kāhui rangatira a iwi anake.  Heoi, e wawata ana ia ka rerekē tēnā i tētahi whakaaetanga hōu.

E ai ki a Maanu Paul me whai wāhi te Kaunihera Māori ki te paepae kōrero me te Kāwanatanga, ā, e tuhi reta ana rātou ki te Pirimia e tono ana i tēnā.

Ko tētahi kawenata me te Kāhui Rangatira ā-Iwi hoki te hiahia a te Kaunihera Māori, e whakarārangi ana i te toronga o te mana o ngā rōpū e rua.

E ai ki a Tā Toby Curtis o te Kāhui Rangatira ā-Iwi he whakaaro pai, engari me kōrero tuatahi e rātou.  Hei tā Maanu Paul ki te whakatīnanatia te kawenata rā e kore e taea e te Kāwanatanga te karo i a rātou.

Tūturu i Waitangi i tērā wiki i tukuna e Maanu Paul te ringa aroha ki te Kāwanatanga, engari tē aro nuitia e te Pirimia.

Kāti ko te wawata a Maanu Paul hei te marama o Mei waitohungia ai tētahi kawenata me te Kāhui Rangatira ā-Iwi, ā, mā te wā te whakatau pēnā ka harirutia e te Kāwanatanga tēnā ringa o te aroha.