Kaupapa: Politics

Me rapu rautaki kia anga whakamua ai te Pāti Māori

E tika ana he tau nui kua taha ake ma te Pāti Māori, te wehenga o ana kaiārahi takirua taketake a Tariana Turia raua ko Tākuta Pita Sharples, te rironga o aua tūru e rua ki te Rōpū Reipa i te kōwhiringa pōti, me te urunga tuatahi mai o tētahi i te rārangi o te Pāti, arā, a Marama Fox.

Katoa ēnei take ka wānangahia i te hui a tau a te Pāti Māori ki Whangaehu.

Kotahi te kaupapa matua hei ata wānanga mā te Pāti Māori i ngā rangi e haere ake nei, ara, ko tana rautaki anga whakamua.

E ū tonu ana te Pāti Māori ki te whakaaro me noho ki te tepu kāwanatanga ki reira whai hua ai, engari, e ai ki ngā tatau o te kōwhiringa pōti karekau te iwi i te marama kite i tēna. Ā, koia pū te wero mā te Pāti Māori.

He hora i ngā kai mā Ngai Māori i te tepu kāwanatanga te take e ai ki te Pāti Māori e mahi tahi ana ia ki a Nāhinara. I tēnei rā ko ngā kai kē mā āna mema e whakaritehia ana e Tariana Turia, i tana marae o Whangaehu.

E ai ki a Tariana Turia koia hoki te raru o te Pāti Māori. Hei tana, na te putanga o te Pāti mai i muri ki mua, ara ki ngā turu minita, i ngaro haere tana hononga ki nga kaipōti Māori.

Nōreira te pātai, pēna e tika ana inaianei tā te pāti noho tonu ki taua tepu me te pupuri tūranga minita?

Hei āpōpō tukuna ai te tūranga kaiārahi takirua wahine ki a Marama Fox. E whakapono ana a Tariana Turia koia tētahi wāhanga nui o tā te pāti anga whakamua. Apiti atu ko te whakarahi ake i ana mema.

Kāti e mōhiotia ana ko te kai te timatanga o te whakapakari hoia, ā, mārakerake te kitea hei te otinga o tēnei hui a tau rite ai ngā mema mo te pakanga ki tua.