Mana Dotcom - Kua hono anō rā ngā tai e rua?

Mana Dotcom, koia rā tētahi ingoa hōu e rere haere ana i te ao tōrangapū - i te kaiārahi o Mana, i a Hone Harawira e aronui ana ki te mahi tahi pea me te Paati Ipurangi, a te kaimiriona Tiamana rā a KimDotcom. He whakaaro kua hiki tukemata, kauaka i te iwi whānui engari anō i roto tonu i a Mana.

I a Hone Harawira e korero ana mō ēnei tauira o te kura o Moerewa, e rere ana hoki ngā kōrero kei te haututu a Mana i te whakaaro kia noho tahi ai me KimDotcom, ā, tūturu e kiia ana ko tērā e kānapanapa ana - ko te pūtea.

E ai ki a Hone Harawira e meingia nei, “mēnā e ū tonu ana ki tōna kōrero kia whawhai atu ki a John Key me Nahinara, kei konei mātou hei hoa tata.”

I te timatanga o tēnei tau hui tahi ai a Hone Harawira me KimDotcom ki Tāmaki Makaurau. Hei tā Hone Harawira karekau i kōrerotia te pūtea, engari kē ko ngā kaupapa tapatahi. Hēoi, ko te whairawa o KimDotcom tērā e kore e tāea te karo - he tūāhua e mōhiotia ana e te kaimahi a Hone Harawira ki te whare Pāremata e Jevan Goulter. Hei taana ahakoa e mōhiotia ana he tangata kaitā, kiritea, whai rawa hoki a KimDotcom, he hua tonu ka puta mō Mana. Hēoi, e tika ana kua tōtara wāhi rua ngā whakaaro o te pāti, e ai ki te mema pāremata ō-mua a Sue Bradford ka wehe ia i a Mana ki te hono tahi rātou.

Engari, ko tā Hone e kii nei, “I tēnei wā e kore mātou e tino mōhio ana he aha ōna kaupapa, ko wai āna tāngata me āna āhuaranga katoa nōreira kei te haere a Mana i runga i tōna huarahi, taro ake te wā mēnā kei a ia he kōrero mō mātou, tukuna mai tētahi wāea.”

Kāti, hei te marama e haere ake nei tū ai te hui ā-tau a Mana, ki reira āta wetewetehia ēnei tū take i te kōwhiringa pōti e whakatata mai ana.