Kaupapa: Education

Kua whakapuaki te Kāwanatanga i tana rautaki whāngai tamariki ki rō kura

Te Kāea

Nō te rangi nei, ka whakapuakitia e te kāwanatanga tana rautaki whāngai tamariki ki rō kura, waihoki tana whakapikinga pūtea mō ētahi kaupapa hauora, whakakākahu tamariki anō hoki.

He iwa me te haurua miriona tāra mō ngā tau e rima ka tītarihia atu ki te kaupapa, KickStart Breakfast, a ngā kamupene o Sanitarium me Fonterra, e kitea ai te whakawhānuitanga o tērā kaupapa, atu i ngā rā e rua i te wiki ki te rima.

I tēnei wā mā ngā kura kei ngā pae o raro e whā noa tēnei ratonga, heoi hei tērā tau ka whakatūwheratia ki ngā kura katoa e hiahia ana.

Tuia ki tēnā, he kotahi me te haurua miriona tāra mō ngā tau e toru ka tukuna ki a KidsCan hei whakapiki ake i āna kaupapa hauora, whakakākahu tamariki hoki ki ngā koti marangai me ngā hū.