Kaupapa: Politics

Kua wātea ngā tono hoko hea mō Mighty River Power

He whakatairanga, he kotahi miriona tāra te wāriu, e ngā kaiutu tāke, kua tīmata kia pāhotia ai te hokona hea i te kamupene Mighty River Power.

Ka hokona atu he whā tekau mā iwa ōrau o te kamupene ki te iwi whānui, a, ko te oati a te Kāwanatanga, ko ngā tāngata o Aotearoa ka whai wāhi tuatahi atu.

Ko tā te Pirimia Tuarua ko Bill English nā tenei ka taea e te Kāwana te whakawātea i te rima ki te whitu piriona tāra, he toru ōrau o te katoa o ngā rawa o te motu. 

Ka whakapaua tēnei pūtea ki ētahi kura hōu, ki tētahi hōhipera hōu hoki ki Ōtautahi, ka mutu, ka iti iho ngā pūtea taurewa me tono e te Kāwanatanga.

Ā, e matapaetia ana ko te iwi whānui ēra kaipupuri hea, engari, he kotahi mano tāra te utu iti rawa atu e whai hea ai te tangata, nā reira he nui rawa pea taua nama mā te katoa.

Ko te whakahoki a English ki tērā, me hono ki tētahi atu mēna e kore te whānau kotahi e taea te hoko mō te kotahi mano tāra, ko tāna ano koira te utu iti rawa atu ka taea te whakaritea mō ngā hea.

Nō te rangi nei tīmata ai te toru wiki, e taea e te hunga pirangi hea, te rehita tōmua i taua hiahia, ā, hei whakapoapoa i te hunga ka pērā, kā riro pea i a rātou he hea e rua tekau mā rima ōrau nui ake i ērā ka riro i te tangata kihai i rēhita.

Ko tā te Minita Hauora ko Tony Ryall mēna he hiahia tā te tangata nō Aotearoa te hoko i te rua mano o ngā hea, ka taea.

Ahakoa kāore anō ngā utu mō ngā hea kia tau noa, hei tērā marama puta ai ngā whakamārama, kāore tonu te katoa e hari ana i te whakatūmataititanga o Mighty River Power.