Kua tuku pōti te hunga o Te Raki mo tā rātou māngai ki rō Paremata

Hei te pō tonu nei whakautua ai te pātai ko wai ka wikitoria i te kōwhiringa pōti motuhake o Te Raki.

Hei te whitu karaka kapi ai te wā tuku pōti, otira, neke atu i te tekau mā tahi mano tāngata kua tuku pōti moata kē.

Kei Kororareka tā mātou karere take tōrangapu a Maiki Sherman.

Hei tāna i tae atu ia rāua ko tana kaikamera ki tētahi whare pōti i Whakapara, tētahi hapori pakupaku ki te raki o Whangarei, ā, ahakoa karekau he rārangi tāngata i tatari ki waho, i auau tonu te tatū mai o te tangata ki te pōti. I pērā hoki i Kororareka nei. E tika ana te kii ake kua aronuitia tēnei kōwhiringa motuhake e tēnei rohe pōti.   

Kotahi noa te hoiho ka wikitoria i te whakataetae mo Te Raki. E ai ki a Shannon Pene ahakoa ko wai, he mahi nui kei tua mōna.

Mārakerake te kitea i te maharahara i ētahi kaipōti tokorua mo ngā ahuatanga ki Te Raki.

Ae ko tetahi kaiārahi te hiahia i te mema paremata wikitoria, ā, ko ngā tamariki te aro nui, matua ra te hunga hāere ki te kura hiakai ai.

Kāti, pakeke mai, taiohi mai, i taetae atu ngā mema o tēnei rohe pōti ki te whakatinana i o ratou whakaaro.

Ae kāore e roa ka ū mai te tereina o Te Raki ki te pae, ki reira kite ai ko wai ka puta wikitoria mai.