Ngā kaupapa: Housing, Politics

Kua tono a Harawira kia tatauhia anō ngā pōti, ā, hei tā Bennett me kaha ngā iwi ki te whakatū whare hapori

Kua tuku tono a Hone Harawira, te kaiārahi o MANA, mema pāremata ō-mua anō hoki, kia tatauhia anō ngā hua pōti o te kōwhiringa i te tūru o Te Tai Tokerau.  Ki tētahi whakapuakanga kōrero i puta i te ahiahi nei, i mea tētahi amokapua o te rōpū o MANA, tērā ngā āwangawanga mō ngā pōti motuhake kāore i whakaaehia ki te kaute.

E ai ki a Hone kua māhue ake ētahi o ngā pōti nā te mea kua kore taua tangata rā e tuhia ki te rārangi pōti. He whitu rau toru tekau mā iwa ngā pōti i waenga i a Hone, me te toa whakaihu waka a Kelvin Davis, engari ki tā Hone, ehara ko te wikitoria te mea nui, engari kē ko te manākitanga pai o ngā kaipōti ki Te Tai Tokerau.

He mārama te kite i te maia o ngā mema tōrangapū o Nāhinara, ā, ko te minita hōu o ngā whare hapori a Paula Bennett tētahi e whakahuahua ana i ōna wawata.  Kua whakatuturuhia e Bennett e hokotanga atu o ngā whare kaporeihana me tāna whakahau ake, tērā te wāhanga hei ekenga mā ngā mana ā-iwi e whai whare ai te Māori.

Kua riro anō i a ia tōna whare, engari kāore ētahi kairēti whare kaporeihana i pēnei rawa te waimārie.

Kua mōhiotia whānuitia te hiahia o Nāhinara ki te hoko atu i ngā whare kaporeihana, ā, kia whai wāhi mai anō ngā mana ā-iwi ki ngā kaupapa whakatū whare hapori.

E ai ki a Terry Puketapu o Te Rūnanga o Taranaki Whānui, kāhore ngā whare hapori i te whiringa pai, ā, kei te titiro kē rātou ki tētahi whanaketanga papakāinga ki Wainuiōmata.

Kāore anō a Terry kia mōhio mēnā ka whakatutukitia te whakarite nei, engari kei whakapono ia me huaki te kuaha o te kāwanatanga.