Kua tae pea ki te wā e rāngona ai ngā reo o ngā kōhanga reo

Kua hia marama inaianei ētahi kōhanga e karanga ana kia whai reo ai rātou ki Te Poari Matua, waihoki, kia mārama pūahoaho ai ngā whakahaere i te taumata o runga. Kāti, nō te rangi nei ka whakapuakitia ētahi mahere ki a rātou e tutuki ai pea tēnā.

Ko te tauira tuatahi, ko Kōwhai:

Tekau mā tahi ngā mema poari. Tokorima, mā ngā kōhanga e tohu, tokorima anō mā tētahi kāhui pōti, ā, kotahi te turu mā Kīngi Tuheitia. Mō te taha ki nga kōhanga, ka ahu mai te mana tohu i ngā rohe tekau, mai i Te Tai Tokerau tae rawa atu ki Te Waipounamu.

Kāti, ko te tauira tuarua, ko Mātai:

Tokoiwa ngā mema. Tokowhitu no nga Rohe Reo, ara ko Te Tai Tokerau, Tainui, Te Arawa, Te Tai Rawhiti, Te Tai Hauauru, Te Waipounamu me Mataatua. Tokorua ka tohua e ngā Taone Nui.

Ka whā tau te roa o nga mema e noho ana ki te poari, ā, ka kore Te Pataka Ohanga, otira ka riro āna mahi i Te Poari Matua.

Ko te tauira tuatoru, ko Totara:

Tokoiwa ngā mema. Tokorima mā ngā kōhanga e pōti, otirā ngā rohe kōhanga tekau. Tokotoru mā te Poari Matua e tohu, ā, kotahi te tūru mā Kīngi Tūheitia. E whā ki te rima tau te roa o ngā mema ki te Poari.

Ka mutu ko te tauira tuawhā, ko Rimu:

E whitu ngā mema ki te Poari Matua. Tokotoru mā Te Whare o Te Kōhanga e pōti. Tokotoru mā tētahi kāhui pōti. 

Kotahi mā Kīngi Tūheitia. Kāti, ko Te Whare o Te Kōhanga Reo tētahi poari toru tekau tāngata te nui. Tokotoru ka tohua mai i ngā rohe kōhanga reo tekau katoa. Mō Te Pātaka Ohanga, ka whakahaere pōti kia tohu mema hōu. 

Kāti, i ngā tauira katoa ko te mahere kia whakatūria hoki tētahi kaunihera o te hunga whakapeto ngoi mō te kōhanga reo e kiia nei, Te Kāhui Rangatira. Ka noho hei pou tautoko mā te Poari, ka aro turuki hoki i ngā whāinga ka tutuki i te poari.

Nō reira e whā ēna ngā tauira mō tētahi hanganga hōu o Te Poari Matua. Mēnā rānei ka whai tautoko i ngā whānau kōhanga, mā te wā noa e kite ake.