Ngā kaupapa: Business, China

Kua tae atu te tira pākihi Māori ki Haina

E whai wāhi nui ana a Ngāi Māori ki roto i te haerenga nui a te Pirimia, a ētahi māngai o tana kāwanatanga me tētahi tira pakihi nō Aotearoa ki Haina.  Kei reira a John Key e manako nei ki te whakanui ake i ngā hua kua riro i a Aotearoa nō te hainatanga o te kawenata tauhokohoko wātea ki a Haina i ngā tau e rima ki muri.

Nōnanahi nei, ka tūtaki atu a Key ki te Perehetini hōu o Haina, ki a Xi Jinping i te hui wānanga ki Bo'ao.  Ko te hui tuatahi tēnei ki waenga i a rāua, nō te pōtitanga o Xi hei perehetini i te marama ki muri nei.  Hei tā Pirimia Key, e kotahi ana te whakaaro o te perehetini hōu ki te whakakaha ake i te whanaungatanga ā-tōrangapū, ā-hokohoko hoki i waenga i a Aotearoa me Haina.  I te tau ki muri, i eke te wāriu o ngā hua hokohoko ki te $14.6 piriona.

Ko te Minita Take Māori, a Tākuta Pita Sharples hoki tētahi kei tēnei haerenga ki Haina.  Kei tōna taha, ko tētahi tira pakihi Māori e aro nui atu ana ki te whai pānga atu ki tēnei whakawhanaungatanga whai rawa ki waenga i ngā whenua e rua.  Ā, e arumia ana te tira haere, e tā mātou karere take tōrangapū, e Maiki Sherman.