Kaupapa: Mining

Kua puta te tūpato ki ngā Iwi whai muri i te whiwhinga raihana o ngā Kamupene keri hinu

Heeni Brown

Kia tūpato, kia mataara koutou ngā iwi e aro ana ki te mahi tahi ki ngā kamupene kōhinu, ki a Chevron me Statoil, kua whakamanahia e te kāwanatanga kia hōpara i ētahi o te whā tekau mā waru mano kiromita o Aotearoa ki te kimi kōhinu me te kāpuni.

Koia te whakahau a tētahi roia Māori, he tino māngai mō te whakahē i ngā mahi keri kōhinu ki Aotearoa nei.

Horekau e tawhiti atu ana ngā mahara o Dayle Takitimu i ngā pakanga maha o tōnā iwi o Te Whānau a Apanui me Greenpeace ki a Petrobras, te kamupene keri kōhinu nui nō Brazil, i whakaaetia kia hopara i te papa moana o Raukūmara i te tau rua mano tekau.

Iaianei na, he maharahara hou ōna mō ngā uri whakaheke, i te whakaaetanga kia hou mai te kamupene kōhinu hou a Chevron ki Aotearoa.

E ai ki a Dayle Takitimu, “Ki te whaiwhai moni noa iho, ahakoa te tapu o te taiao, ahakoa te tapu o te taiao kaare ngā tangata whenua i whakaae engari kei te haere tonu mai rātou.”

Ka mahi ngātahi hoki a Chevron me Statoil, te kamupene e hopara haere ana i te papa moana o Te Reinga, ā, ahakoa ngā porotēhi nui i ngā rangi whakatā,

Me te parekura kōhinu ki Brazil, i kitea ai te pupu mai o te neke i te rua mano kāho kōhinu he toru tau ki muri, ko Haami Piripi o Te Hiku o Te Ika tēnā e aro atu ana ki te mahi ngātahi me Statoil.

Ki tā Haami Piripi, ''Kua whakaae mai tēnā kamupene a Statoil ki tō mātou nei tangata kia haere ki runga i tō rātou nei waka hei kanohi hei taringa noa mō te iwi, nā, kua whakaae rātou ki tēnā, engari he tīmatanga noa iho.”

Hei tā Dayle Takitimu, “Titiro atu ki ngā iwi o Taranaki me ngā iwi o Taranaki, ahakoa kua kī te karauna he pai rawa ngā rawa o Taranaki, me kōrero koe ki ngā tangata whenua ngā tāngata paraone kāore kei a rātou ngā rawa, kāore kei a rātou ngā mahi kua waiho ngā paru noa iho ki a rātou.”

Ahakoa te whakahē ā ētahi i ngā whakahau a te Kāwana, ā, te Poutūterangi, whakarewaina anō ai ngā whakaaetanga hopara kōhinu mō te tau.