Ngā kaupapa: Elections, Te Reo Māori

Kua pupū ake ngā whakahē e pā ana ki te Pire reo Māori

Kua tū ngā pihi o te Minita i te hunga whakahē i tana Pire hōu mō te reo Māori.

Hei tā Pita Sharples, “Hoki atu ki o koutou rangatira, kōrero tahi ki a rātou.”

Tūturu e rere ana ngā wero i te Rōpū Reipa me Mana i te rangi nei.

Heoi, i tua i ēnā rangatira ā-iwi me ētahi atu, arā hoki te tokomaha o ngā tāpaetanga kōrero mō te rautaki reo Māori i whakapuaki māharahara ki te poto o te wā ki te āta whiriwhiri i te rautaki, waihoki, he āwangawanga mō te poari hōu, mō Te Mātāwai, ka riro i a ia ngā whakahaere o Te Pūtahi Paoho, ka noho mana nui hoki ki Te Taura Whiri, Te Māngai Pāho, me Whakaata Māori.   

E ai ki a Mana ka whakarerea te haepapa o te Karauna ki te reo Māori i raro i Te Tiriti o Waitangi ki te tukuna te mana whakahaere ki Te Mātāwai. E ai ki a Pita Sharples, karekau, nā runga i ngā māngai tokorua o te karauna ka noho ki taua poari.

Kāti, ko te karanga a te āpitihana kia tukuna te pire ki te Taraipiunara kia arotakengia ai - he āhuatanga e kore e taea i te pire e tau ana ki te aroaro o te whare pāremata.

I raro i te kaupapa here reo Māori a Mana, e mea ana rātou kia kaua e whakatūria ko Te Mātāwai engari kē me whakapakari Te Taura Whiri i Te Reo Māori, me tū motuhake hoki ia i runga i tōna ake mana, kaua ki raro i te karauna.

Āe mārika e kore tēnei tohe e mutu inangeto nei.