Kaupapa: Politics

Kua poroporoakitia a Hone Harawira i Pāremata

Tūturu, he reo kaha tōna mō te pani me te rawakore i te whare miere, ā, ahakoa tana wehenga atu, e ai ki a Hone Harawira e kore ngā mahi e oti noa.

Rere kau ana ngā mihi a ngā kai-tautoko o MANA i tau atu ki te whare paremata i te rangi ki te poroporoāki atu i a ia.

Ko Hone Harawira tēnei e takahi ana i ngā kauhanganui o te whare paremata mo te wā whakamutunga.

I tae mai tōna whānau me te iwi o MANA ki te whakahoki i tēnei rangatira o Te Tai Tokerau ki te wā kainga.

I timata ngā kōrero o Hone Harawira i te timatanga o tana hikoi ki te whare pāremata, ara, te hikoi takutai moana rua mano mā whā.

Tūturu e kore te mema ngutu pūkaka mo te wehe i mua i te whakatakoto wero. 

E iwa tau a Hone Harawira e pupuri ana i te turu o Te Tai Tokerau. He mea turaki e Kelvin Davis mā ngā pōti kotahi mano kotahi rau.

E ai ki a Kim Dotcom nōna te hē. Heoi, karekau a Hone Harawira i kōrero mōna, mo te Pāti Ipurangi, mo ngā tatau kōwhiringa pōti rānei.

E ai ki ngā mema o MANA ehara ko Kim Dotcom taua utu i hinga ai a Hone Harawira.

Ae marika ehara tōna i te ahi tineia noa. Ā i ngā hui a motu kua whakahaeretia e MANA i ngā rangi kua taha puta ai te kōrero ka whawhai tonu, ake, ake.