Kaupapa: Elections

Kua huri te aro o ngā mema Māori o Reipa ki ngā tūru Māori

He rapu oranga te mahi a ngā kaitono Māori nei o Reipa, pēnei i a Kelvin Davis kua hinga i te Mema Paremata mō Te Tai Tokerau, i a Hone Harawira i roto i ngā kōwhiringa pōti e toru katoa kua whai wāhi atu a ia mai anō i te tau 2008.

Hei tā Kelvin Davis, “Looking forward to winning the seat of Te Tai Tokerau, and bringing it back to Labour.”

Hoino, e nōhia tonutia ana ngā rohe Pōti Māori o Hauraki-Waikato, Te Ikaroa Rāwhiti me Te Tai-Tonga e ngā mema Māori o Reipa, ā, ko ngā pou o Te Pāti Māori ērā, kua wehe atu hei kaitono ki ngā rohe o Tāmaki Makaurau me Te Tai Hauāuru.

Ka mutu, e tuwhera ana ērā rohe kia kapohia ake e wai raini, ā, kua hikitia ake te mānuka e ngā kaitono, e Peeni Henare rāua ko Adrian Rūrawhe.

Engari, he takingaroa pea mā Rawiri Waititi, kia tango ake i te Rohe o Te Waiariki, i ngā ringaringa o Te Ururoa Flavell, kua noho hei Mema Paremata mō taua rohe mai anō i te tau 2005.

A, me kaua rawa e wareware i te kaiārahi takirua o Mana, i a Annette Sykes, e tohe anō ana i taua tohe. 

Ko ngā aho o ngā kaupapa whakararata a ngā kaitono Māori o Reipa i tēnei Kōwhiringa Pōti, he whakapiki ake i te kounga o te oranga o ngā whanau, he whakapiki ake i ngā ahuatanga ako, mahi hoki mā te hunga rangatahi, me te kawe i te kaupapa whai kāinga mā roto i te kaupapa Kiwi Build.