Kaupapa: Elections

Kua hono tahi te marea ki te karanga atu ki te Kāwanatanga ki te whakaheke i ngā raru rawa kore mo ngā tamariki

Heeni Brown

I takahia haeretia te puku o Tāmaki Makaurau i te rangi nei e te rōpū Child Poverty Action, i tētahi hīkoi hei waha i tō rātou hiahia mō muri tata tonu i ngā kōwhiringa pōti, arā, kia whakakotahi ake ngā kaitōrangapū me ngā rōpū tōrangapū katoa ki te whakatutuki i tētahi mahere kotahi hei whakakore atu i te noho rawakore a ngā tamariki o te motu.

He hīkoi hei kume i te motu whānui ki tā te rōpū Children Poverty Action e hiahia nui nei, arā, he patu noa atu i ngā tatau tamaiti rawa kore.

Hei tā Henare O'Keefe, “Mēna ka tuku aroha, ka tuku whakaaro kaha te Kāwanatanga ki tēnei kaupapa kino ka tāea e rātou te whakakore i te noho rawa kore o a tātou tamariki.”

E rima ngā tūtohutanga kei te rautaki whakaheke tatau tamariki pōhara a te rōpū, e tumanakotia ana ka whai wāhi ki ngā ringaringa o te Kāwanatanga.

Ko tētahi wāhi o te rautaki, he hiahia kia horongia ake te whakaheke i ngā tatau tamariki pōhara mō ngai Māori me ngā uri Pasifika, E rite ake ai rātou ki tamariki kē atu.

Ko tā Efeso Collins, “ko te tikanga o tēnei kaupapa ko te whakaoho ake i te Kāwanatanga ki tēnei kaupapa whakahirahira, kia tiro wawe ake rātou ki te whakatika, kua hono mai te taha maui ki tēnei kaupapa ara ko Reipa, ko ngā Kākāriki, ko Internet MANA rātou ko te Pāti Māori, ko rātou kei te whakarongo ki a mātou karanga.

O ia rōpū tamariki tokowhā o te motu, kotahi o rātou ka rongo i te pōharatanga, nā reira, he rua rau ono tekau mano o ngai tamariki kua taka iho ki te rua o te pōharatanga.

Ko tā Hone Harawira, “Ka tāea te kāwanatanga whakaoti i tēnei mamae āpōpo, whāngai i a tātou tamariki.”

E ai ki a Jacinta Ardern o Reipā, “mai rāno kua āta tiro atu rātou ki te whakatika i ngā raru rawa kore a te hunga tamariki, ko te mea pōuri rawa i korero mātou ki a Nahinara ki te whai tautoko, heoi kua i huri tuara rātou ki ta mātou whai.”

Māmā noa te kite i te mahi tahi ā ēnei kaitōrangapū i konei, engari me nui ake i tēnā, e tutuki ai ngā āwhero o tēnei hīkoi.

Ko tā Metiria Turei o Te Rōpū Kākariki, “ Kei ngā kaipōti te mana whakaritenga mo te Kāwanatanga hōu inā mēna ko te hunga tamariki te mea tuatahi me pōti kā tika,”

Hei te wā ka mana te Kāwanatanga hōu ka kitea pēna rānei ka hikina te rautaki whakaheke tatau tamariki pōhara a te rōpū CPAG.