Kaupapa: Politics

Kua hoki te Minita ki te whakatika i tana hē

Kua ara ake anō te take mo Te Poari Matua o Te Kōhanga Reo ki te Whare Paremata, ao ake i te whakaputanga o ngā kupu whakamārama mo te ōtita motuhake kua kokiritia e te Kāwanatanga.

E ai ki te Minita mo ngā Take Māori, te Minita Tuarua mo ngā tTake Matauranga a Pita Sharples no te po tonu o te whakapāhotanga o te pūrongo a Native Affairs i whai māramatanga ia ki ngā whakapae whakapaunga pūtea. Engari, e ai ki etahi imera mai taua hōtaka ki te Minita i whakamohiotia tōna tari mo ngā take o roto i Te Kōhanga Reo, tae rawa ki nga take whakahāere pūtea, kaua i te tekau mā whā o Oketopa, engari he kotahi marama ki mua i te iwa o Hepetema.

Na wai ra ka hoki atu te Minita ki te whare taupatupatu. ki reira whakatika i te hapa.

E ai ki te tari o te Minita no te rua tekau mā whā kē o Hepetema i whai māramatanga, inā koa kahore ngā kupu whakahaere pūtea o te imera i te tuawhā i tohu ki a ratou he raru pūtea te take.

Kāti, e ai ki a Nanaia Mahuta, ahatia te rā, ko te mea kē ko te takaroa o tā te Minita wānanga tahi i ngā whakapae mō roto i te Kōhanga Reo me te Minita Matāmua a Hekia Parata.

Ko te mate pea, ko te whakahē a ētahi i te ahua whakapāho i wena tū take. Kua rangona te korero a ētahi mātanga papāho me noho ki rō whare kē. No te rangi nei puta i te Kaiarahi-Takirua o te Pāti Māori a Tariana Turia tana matangurunguru ki a Whakaata Māori.

Ko tā Turia “kare i te tika kia whiu whakapae a Whakaata Māori ki tētahi rōpu perā i te Kōhanga Reo”

Kāti, hei ta Mataatua Tauranga Moana e ū tonu ana rātou ki tā rātou whakaritenga ki te whakaputa i ā rātou whakaaro, ina mena i whaia te tikanga Māori i te whakatahanga o Titoki Black, kua kore te roanga ake o enei raruraru e puta ki te aō whānui.

Hei te ono wiki ka oti te ōtita.