Kaupapa: Politics

Kua hoki atu anō a Judith Collins ki tōnā ahurewa hei Minita Ahumatua

He rerekētanga kei roto i te rūnanga Minita o te kāwanatanga, he mea whakapuaki i te Pirimia, i tana kauhau ki te hunga pāpāho i tēnei ahiahi tonu. 

Kua hoki atu anō a Judith Collins ki tōnā ahurewa hei Minita Ahumatua, Minita Pirihimana hoki.  Ka whakakī a Collins i te tūranga a Peseta Sam Lotu-Iiga. Nā, ko Lotu-Iiga tērā i rongo i ngā taukumekume o te wā e pā ana ki ngā āhuatanga whakahaere a Serco ki Te Whareherehere o Moutini i tēnei tau tonu.

Engāri ehara i te mea ko tēnei te mahi minita mutunga a Lotu-Iiga tā te mea, ka noho tonu ia hei Minita.

Nā, ko te āhua nei kua papa pounamu ngā wai ki a Collins. I mua i te Kōwhiringa Pōti o tērā tau, i rīhaina a Collins mai i ana turanga ture, i te mahutatanga mai o āna emera ki a Cameron Slater me tana whai wāhi atu ki te hāpai i te Kamupene o Haina a Oravida, nā runga hoki i te mōhio, e whai wāhi ana tōnā hoarangatira ki te kamupene rā. 

Ko te Minita Hokohoko a Tim Groser te māngai hou o te motu ki Amerika. Ka rīhaina a Groser a te Tihema, ā, ko te Mema Paremata mō Rotorua a Todd McClay ka whakakapi i te tūranga. 

Ka noho a Sam Lotu-Iiga hei Minita, koia tērā kua kapo ake i te tūranga Minita Kawanatanga a Rohe i a Paula Bennett.

Ka whai mana ēnei whakaritenga hei te tekau mā whā o Tīhema.