Koia tēnei te rā tuatahi kua tū ai tētahi hararei ā-motu i te Rāhina

Koia tēnei te rā tuatahi kua tū ai tētahi hararei ā-motu i te Rāhina, e whakanui ana i te rā o Anzac. I raro i te ture i kōkiritia e te Rōpū Reipa kotahi me te haurua tau ki muri, ki te taka te rā o Anzac me te rā o Waitangi ki te Rāhoroi, te Rātapu rānei, ka kawea te hararei ā-motu ki te Rāhina.

Ko te nuinga o te motu e whakatā ana i tēnei rā me o rātou whānau, ā, e ai ki te Rōpū Reipa nā rātou tēnei ture i kawe ake me pērā ka tika kia whai wā te motu ki te whakanui i ngā painga kua hora i ngā hōia i pakanga kaha mō te motu.

Hēoi, i te mea koinei te wā tuatahi kua whakatinanatia tēnei hararei o te Rāhina, kua ahua rangirua ētahi o ngā kaiwhakahaere pakihi e ai ki te māngai o te Rōpū Kaituku Mahi.

Kāti i pīrangi māotu ki te kōrero ki te māngai mō nga pānga ēngari i te hararei ia i tēnei rā nōreira ēhara pea i te mea he raru nui rawa atu.

Kei te whenua o Dubai te Pirimia e whakawhiti kōrero ana me ngā ūpoko o reira e pā ana ki a tātou hononga pakihi.

Tekau mā waru ngā kaipakihi no Aotearoa kei te taha o John Key e whakatairanga ana i ngā mahi o taua rāngai.

Ko te hiahia a te Pirimia ki te whakatinana i te whakaaetanga hokohoko i waenga i a Aotearoa me nga whenua GCC o reira.  

Hei āpōpō hoki mai ai ngā mema pāremata ki te whare miere mahi ai, kua toru wiki ngā mahi i te whare e hikina ana.

Āpōpō ka uru mai ko te mema pāremata hōu mō Aotearoa Tuatahi ko Ria Bond, he uri nō Ngāti Hine me Ngāpuhi.