Kaupapa: Elections

Ko Tunuiarangi McLean te māngai ma te Pāti Māori ki Tāmaki Makaurau

No te ra nei, ka tuku ngā mema o te Pāti Maori i Tāmaki Makaurau ngā pōti ki te tohu ake ko wai ta ratou kaitono hōu mo Tāmaki Makaurau i tenei kōwhiringa pōti, a, no ngā miniti tata nei ka puta ko te ingoa o Tunuiarangi McClean.

Heoi ano, ahakoa kahore ano te Pāti Reipa kia whiriwhiri ko wai kē ta ratou kaitono, arā ngā kaitono e rua kua puta.

Karapinepine atu ngā mema o te Pāti Māori, ki te tohu ake ko wai ka whakakī i te whārua ka mahueiho mai i a Pita Sharples.

Ko tā Pita Sharples, “pai te katoa i taku whakarongo ake ki a ratou e korero ana, a rātou hiahia, e mōhio ana ahau ki te katoa o ēnei, ki te tokotoru, na reira harikoa kua tae ki tēnei wāhi.”

Ko Bronwyn Yates o Te Arawa, ko Tunuiarangi McLean o Tuhoe, ratou ko Te Hira Paenga o Ngati Porou era i tono hei kaitono mo Tamaki Makaurau mo te Pāti Māori.

Ko tā te tangata i kowhiria hei māngai ki Tāmaki Makaurau mā te Pāti Māori, ko Tunuiarangi McLean, “He momo pukenga wāku ki te āwhina i ngā pukenga i whakaatuhia mai e to tātou rangatira a Pita.”

 Mai ano i te tau 2005, kua nohia te tūru Māori o Tāmaki e Pita Sharples o te Pāti Māori, ā, ahakoa e timu ana te tai ki a Sharples, hei tāna, ka taea tonutia e te kaitono hōu te pupuri i tēnei tūru.

 Kahore ano te Rōpū Reipa kia tohu ake ko wai ta ratou hoiho mo Tāmaki Makaurau, engari kua tuku tono atu te Pou Māori o Te Kura o Te Kotuku a Wiremu Flavell, o Ngāpuhi i tōna ingoa.

 Heoi hei tā tetahi ahikaaroa o Reipa, kahore e tika ana, kia whakatārewa ake i ngā whakaritenga, i ā Te Reo Tātaki e rangahau ana i ngā mahi a te kaitono a Shane Taurima, tumu whakarae o mua o Te Reo Tataki.

 E wawata ana te Pāti Māori kia puta ko nga ingoa katoa mo era ka tuku tono atu mo nga tūru Māori katoa i tenei kōwhiringa pōti i roto i ngā wiki e rua kei te heke mai.