Kaupapa: Shane Taurima

Ko ngā raru tōrangapū te ito o ngā kōrero i whiua ki ngā māngai o Te Reo Tātaki ki te Whare Paremata

I tāmarutia te hanga pai o ngā pukapuka pūtea a Te Reo Tātaki i te nohonga o ngā ūpoko ki te aroaro o te Komiti Whāiti Take Tauhokohoko o Pāremata. Ko ngā whakapae mō Shane Taurima me āna mahi mā te Roopu Reipa i a ia i te tūranga toihau o ngā hōtaka Māori, Moutere hoki o te kamupene rā, te take.

I tae ngā upoko o Te Reo Tataki ki te whare paremata ki te kōrero putea, engari, tuturu ko ngā take tōrangapu i roto tonu i te kamupene te aronga nui.

I roto i taua hui i puta te pātai a tētahi o ngā mema o te Komiti Whāiti mena he wāhi whāngai a Te Reo Tātaki i ngā mema o te Pāti Reipa. Ko te whakahoki a ngā manga o Te Reo Tātaki ko te katakata.

Heoi ahakoa te kata, e mohio pū ana Te Reo Tātaki ehara tenei i te take tihohe.

I tua i ngā whakapae mo Shane Taurima, ko tana kaimahi o mua ko Tamati Coffey tērā e whai tūranga ana hei kaitono ma Reipa inaianei. Tuia atu, ko te mema paremata o te wā, ko Kris Fa'afoi hoki tētahi kairipoata o mua mā Te Reo Tataki. Katoa rātou ka noho hei kai mā te ahi.  

Ko tētahi o ngā patai nui ao ake i tā Shane Taurima whakataetae mo te tūranga kaitono a Reipa ki Ikaroa Rāwhiti, i tika rānei te whakahoki i a ia ki tana tūranga tumu whakarae i Te Reo Tātaki. 

Ko tā te Tumu Whakarae o Te Reo Tātaki, ko Kevin Kenrick, “i puta te oati a Taurima ki a rātou kihai i a i te whai tonu i tētahi tūranga mema paremata, inā i whakapono atu rātou ki tāna i kī ai i taua wā.”

Heoi, i whai wāhi tonu a Shane Taurima ki ngā mahi tōrangapu. I tenei hui a Te Kauinhera Māori o Reipa a Taurima i te marama o Oketopa i tērā tau.

Kāti mo te toenga o ngā kaimahi e whai pānga ana ki ngā whakapae whakamahinga rauemi a Te Reo Tātaki, ko Maria Kuiti rāua ko Aroha Mane kua wehe. Aa kaore tonu i te marama mēnā kei Te Reo Tātaki tonu a Natasha Morris e mahi ana. Kaati, hei te marama o Paenga-whawha oti ai te arotake.