Kaupapa: Politics

Kei te whawhai tonu a Hone Harawira raua ko Metiria Turei ki te whāngai i nga tamariki ki te kura

Heeni Brown

E riri ana a Hone Harawira, te kaitautoko i te pani me te rawa kore ki ngā Kaitohutohu Kaupapa Rawa, whai muri i tā rātou tohutohu ki te Kāwanatanga, kua kore he take o tētahi kaupapa whāngai tamariki ki ngā kura.

Engari horekau hoki a ia i te tū me tōnā kotahi, ko Metiria Turei me Te Rōpū Kākariki tērā e wero hoki ana i ngā Kaitohutohu Kaupapa Rawa.

'Pēnā kua whāngaia te tamaiti ka taea e ia te ako,’ he kōrero ēnei e ai ki a Hone Harawira i tuku iho mai i ngā kaiako, engari nā runga i te tohutohu ā ngā Kaitohutohu Kaupapa Rawa, kua kore pea e tū ai tōnā kaupapa whāngai tamariki i ngā kura, arā a 'Feed the Kids.'

Hei tā Hone Harawira, “I tēnei rā e mea ana ngā 'bean counters' nei kia kaua e whāngai tamariki hanga riri ana au ki a rātou.”

Ahakoa horekau a Harawira i te ana o te raiona ki te kawe i te kaupapa whāngai tamariki kore utu mā ngā kura rawakore, hei tāna me whēke tonu ana hoa kaimahi o mua ki te whakatutuki i te pire nei hei ture.

E ai ki a Hone Harawira, “Mēnā e whāngai ana i ngā tamariki kua kore rātou e mate i te māuiui.”

Ko Metiria Tūrei tēnā e whakatakoto ana i te wero ki ngā Kaitohutohu Kaupapa Rawa mō te kaupapa o te rawa kore, koira tā Turei he karanga ki ngā Kaitohutohu Kaupapa Rawa kia kaua e aro noa iho ki ngā nama anahe.

Ka waiho mā Ngā Kākāriki o Pāremata e kawe i te kaupapa whāngai tamariki ki roto i ngā kura.

Heoi anō mā Harawira, kua whakaritea he hui mō tērā marama me ngā peka o MANA ki te āta wherawhera me pēhea e utu i ngā kaupapa whāngai tamariki ki ngā kura.