Kei te whakamātauria te Kāwanatanga i āna whakaaetanga tauhokohoko

Te āhua nei he whakamātautau kei te haere mō te kawanatanga, arā, mēnā ko te hauora o te motu whānui te aronga matua, ranei ko āna whakaaetanga tauhokohoko. Ao ake i te pānuitanga tuatahi o te Pire Tupeka Uhi Tohu Kore inapō, kua puta ētahi whakamahuki e whakapaetia ana ka whai kaha anō ngā umanga tūpeka ki te wero-ā-kooti i taua ture, i raro i te whakaaetanga tauhokohoko, e kiia nei ko te Trans Pacific Parntership.

E ai ki tā mātou karere take torangapū ki a Maiki Sherman, ia ra he tekau mā toru ngā tāngata ka mate ki Aotearoa nā runga i te waranga ki te tūpeka, he pakanga kua kawea ake e te kāwanatanga o Aotearoa. Engari e kore rawa ngā kamupene tūpeka mō te mate wheke noa.

Kei te mōhio mātou ki ngā whakapae mō te kaha o tēnei pire, me te mea anō hoki, e watea ana kia hāmenetia e ngā kamupene rāwaho. Ka tae mai te wā me tū ake te tangata mō taana e whakapono rawatia ai.

Ko Ahitereiria tētahi kua rongo i te ngau o te rāngai tūpeka. I kawea ia ki te kooti mō tēnei tūmomo ture anō, ā, hei tā Ahorangi Jane Kelsey, mātanga ture ki Te Whare Wänanga o Tämaki Makaurau, ka whai mana anō aua umanga tūpeka i raro i te whakaaetanga TPP.

Āpiti atu, e ai ki ngā whakamārama, kua whakatakoto tūmomo menemana te whenua o Merehia ki te kaupare i tēna, engari ae rānei ka tautokona e Aotearoa?  

Kāti, i tua i te mema kōtahi, i whakaaetia whānuitia te pire inapō, ā, e whakapono ana a Tariana Turia ka pērā tonu hei te pānuitanga tuatoru.

Ko te whakapono hei te marama o Akuhata eke ai te pire ki tōna taumata whakamutunga, ki reira kite ai mēnā ka mana kāhore rānei.