Kaupapa: NZ Māori Council

Kei te whai kiko rānei te kerēme a Te Kaunihera Māori?

Nō te kawenga a Te Kaunihera Māori o Aotearoa i tētahi tono ki Te Rōpū Whakamana i Te Tiriti o Waitangi i te Rāmere kua taha, e rere ana te pātai mēnā rānei he amuamu whai kiko, he amuamu matangerengere, whakahōhā noa nei taua kerēme.

E toru ngā take o te tono, katoa e hāngai ana ki te arotake e whakahaeretia ana i tēnei wā mo te Ture Whakawhanake Hapori Māori, te ture tūāpapa o Te Kaunihera Māori me ngā Wātene Māori.

Koinei te kerēme katahi ano ka whakatakotoria e te Kaunihera Māori ki Te Rōpū Whakamana, he kerēme kua hika i te patai mena e whai take ana, mena ranei he tohe puruhi noa?  Ko Takuta Carwyn Jones tētahi ahorangi i te Whare Wānanga o Wikitōria, e aro nui ana ki Te tiriti o Waitangi.

Tūturu, arā ngā kereme kua kawea e te kaunihera Māori ina tata nei, heoi, e ai ki te heamana takirua, ki a Tā Taihakurei Durie, e kore rātou mo te whakapāhā mo tena.

Ko te kereme hou a te Kaunihera Māori e hangai ana ki ta te karauna whakahaere i te arotake mona.  He mea ara ake te Kaunihera na tētahi whakāetanga i waenga i te karauna me ngai Māori, no reira, e ai ki te kaunihera me whai reo te Māori ki tēpu whakatau.

Kāti, no te kokiritanga o te arotake he kotahi marama ki muri, kua rangona ngā tohe i ngā taha e rua, otira, ko te whakāro a etahi o Ngai Māori, kia whakakorea katoatia.

Hei tā Takuta Carwyn Jones, ko te kahui rangatira a iwi te kowhiringa tuatahi pea ki te whakakī i taua turanga, heoi he whakatupato tāna.

E tūwhera tonu ana te taha tuku tapaetanga korero mo te arotakenga o te ture, hei te paunga o tenei marama kati ai.