Kei te wareware tonu ngā tari kāwanatanga ki a tātou te Māori

Dean Nathan

Kei te wareware tonu ngā tari kāwanatanga ki a tātou te Māori.  Koinei tā te heamana o te Kōmiti Whānau Ora o ngā kaiārahi ā-iwi.

E mea ana a Raniera (Sonny) Tau, mai rā anō tēnei āhuatanga ahakoa te nuinga o o rātou kiritaki, he Māori.

Kei te takariri ngā kaiārahi ā-iwi e wareware tonu ana ngā tari kāwana ki o rātou kiritaki Māori.

E ai ki a Tau, “Nā, e mōhio ana tātou ina mahi koe i tētahi mea ko aua mea rā anō ko aua mea rā anō e hoa te whakautu i te mutunga ko aua mea rā anō.  Nā moumou te wā.  Horekau kē mātou e whakaae ana i te mea horekau kē he Māori ki runga.”

Ki tā te Minita Whakawhanake i ngā Kaupapa Māori, i ētahi wā he āhuatanga tēnei e kore e kitea e ia.

Ki tā Te Ururoa Flavell, “I te nuinga o te wā ko te mahi nui i mua i te aroaro o ngā minita he aki ia rātou ki te whaiwhai haere ki tā Raniera e kōrero ana kia whai wāhi ngā Māori i runga i ngā poari i ngā rōpū e āta wetewete nei i ngā take e hāngai ana ki a tātou.”

Ki ngā whakamārama kua whakaae mai te Minita o te Tari CYF a Anne Tolley kia rapu ake i tētahi Māori hei noho ki te kōmiti o ngā mātanga ki a rātou nei kaupapa, inā hoki e whitu tekau mā ono paihēneti o ngā tamariki katoa ki raro i ngā whakahaere o taua tari he Māori hoki.

Hei tā Flavell, “Kua roa mātou e akiaki ana kia pērā rawa te aronganui kia whai wāhi tāua ki roto i ngā nekeneke o te Kāwanatanga.  I te nuinga o te wā ka aro mai i ētahi wā ka hē katahi ka tino hē.”

E ai ki a Tau, “I te mea kotahi rau whitu tekau mā rima tau e whakahaere ana e te Kāwana i tēnei kaupapa ka mutu horekau anō rātou i tika ki a tātou tamariki mokopuna.  Me pēhea rātou mōhio me pēhea te arotake i te kaupapa nei?”