Kaupapa: Politics

Kei te Kōti Matua te iwi o Ngāi Tai ki Tāmaki mō te mana motuhake o Motutapu

Talisa Kupenga

Kei Te Kōti Matua ki Pōneke te iwi o Ngāi Tai ki Tāmaki e pakanga ana mō tōna mana motuhake ki Motutapu, ki Rangitoto anō hoki i Te Waitematā.

E ai ki a James Brown, Heamana o te iwi, kua takahia rā e te Karauna ngā mātāpono o te Tiriti o Waitangi i tāna whakaae kia tuku kirimana mahi ki ngā pakihi turuhi, ahakoa te whakahē a te iwi.

Ano nei a Ngai Tai ki Tāmaki ki te kōti hei whawhai i ngā kirimana i whakaaetia ki nga whenua o Papa Atawhai ki tō rātou rohe.

Ko tā te Heamana o Ngai Tai ki Tāmaki a James Brown, ko Ngāi Tai ngā kaipupuri o te manaakitanga, te kaitiakitanga i ēnei whenua.

Ko tā Brown me whai wāhi motuhake te iwi ki nga tikanga tūruhi, mana hoki hei whakahē i nga tono pakihi.

Kua tae te kēhi ki te aroaro o te Kōti Teitei, te Kōti Pīra hoki i nga tau ki muri.

Ko tā Brown e whakahē ana rātou i tō te kōrero o Tiati Fogarty e kiia ana kua ū tēnei kaupapa ki ngā mātāpono o te Tiriti.

Ko tā te Minita Take Tiriti a Andrew Little, ka ohorere inā kāore a DoC i whakapā atu ki te mana whenua.

Engari kāore te Minita Take Papa Atawhai a Eugenie Sage i te hiahia ki te kōrero.

Ko te whakapae a te iwi i te marama o Hākihea i huna Te Papa Atawhai i te tanumitanga o ngā kau e tētahi kaipāmu ki te moutere o Motutapu. Kei te whakatewhatewha a Pouhere Taonga i tēnei take.

Ko tā Brown kua raru katoa te nehutanga, heoi koirā tō rātou mahitahi me te ohu Pouhere Taonga.

Ka mutu te kēhi ki te kōti hei āpōpō.