Kaupapa: Politics

Kei mua a Whakaata Māori i te Kōmiti Whiriwhiri Māori

Talisa Kupenga

I tū te Heamana hōu o Whakaata Māori a Jamie Tuuta raua ko te Tāhuhu a Keith Ikin ki te aroaro o te Kōmiti Whiriwhiri Māori ki Pāremata i tēnei rā kia whakamātauhia te haere o te teihana. Ko ngā kaupapa i puta, he aha rā te rautaki whakamua, me pēhea te whiwhi pūtea, ā, he aha te whakatau mō te papamahi tuarua o te teihana.

Ko te hiahia a Whakaata Māori kia whakahoutia te rautaki mō ngā tau e rima ki te whakatentena i te hunga rangatahi e kaha ana ki te mātaki i te ipurangi i runga i te mōhio kei te piki haere ngā tatauranga o tēnei hunga ina kei heke iho te hunga e mātaki pouaka whakaata ana.

Kei te mahi tahi te teihana me ngā rōpū rangatahi kia tutuki tēnei take.

I ngā tau e rima kua hipa kua whānui ake te hunga mai teihana kē e tono ana mō te pūtea a Te Māngai Pāho i te mōhio ano hoki kua piki haere te whai mana o ngā hōtaka Māori.

Ko te hiahia a Whakaata Māori kia aro kē atu a Te Māngai Pāho ki a ratou i te tuatahi inā ko te wāriu o ngā pūtea e puta ana ki ērā teihana he ono miriona tāra. 

Inā te ohorere ki te kōmiti kahore anō kia hikina te pūtea tautoko o TMP ki te teihana i ngā tau tekau mā whā kua hipa.

E kore e taea te whakatū he tūāpapa hōu i tēnei wā nā te kore pūtea, ko te whakapae he waru miriona pea te utu.

Engari tērā pea ka taea he tūāpapa nekeneke mō neke atu i te kotahi miriona tāra.

He whakawhiti kōrero hoki ki waenga i te Reo Tātaki mēna ka taea te whakamahi i tō rātou tūāpapa.

Engari tāria te wā mēna ka ea ngā wawata i roto i te tahua pūtea apōpō.