Ngā kaupapa: Education, Politics

Kāre te Kāwanatanga i te whakakore i ā Novopay

Kua whitu marama te pūnaha utu e haere ana ā, inā te nui o ngā hē ōna, i pākia kinotia ai ngā kura. 

Ki rō Whare Miere i puta te pātai a  Chris Hipkins o te rōpu Reipa “mēna ko mātou ēra e mahi ana mo te hunga o Aotearoa, inā kō ā mātou whakaritenga ēra kei te whakararu i ngā tāngata o te motu e tika ana kia rīhaina e te Minita Take Mātauranga nā te mea ko ngā kaiutu take ēra kua utua te $11 miriona ki te whakatika i ngā raru kua puta i āna mahi.”

Uiui kau ana, rapurapu kau ana - me poro rānei a Novopay?

Ko te whakahoki a Nikki Kay o te rōpu Nāhinara ki tēra “e kao, e kōrero ana ahau mō te Minita e whakatika ana i ā Novopay, ko Steven Joyce, he nui ngā mahi kua mahia e mātou ki te whakapakari i a Novopay ana i tēnei rangi kua whakarewahia tētahi kaupapa āwhina mō ēra kua raru i ngā mahi tīmatanga.”

Tēra te whakakao mai a Minita Joyce i tētahi whakautu e noho tonu mai a Novopay, ko tāna kua whakatahangia e ia he $6 miriona hei whakatau i ēra kua whai raru i a Novopay.

He moni whakatika i ngā raru, ka tohua ki tēna kura, ki tēna kura kua pākia.

He $105 tāra ki ia kaiako-ukiuki, tāpiri ki tēna, he $500 hei kīnaki. Hei tauira, mō te kura he tekau ōna kaiako-ukiuki, he kotahi mano, rima rau, rima tekau te utu ka whakawhiwhia. 

Ko tā Shane Jones o Reipa, “na Steven Joyce ano te kii, māna ano ngā whetu o tarangi e mau mai mā te wa e titiro”

Nā, ahakoa ngā whainga a tētahi arotake tē taea e Novopay te karo i ngā pūmanawa-rorohiko.

Engari e pūmau ana a Minita Joyce ki ngā kupu o taua arotake e mea ana 'ka tae atu anō a Novopay ki te taumata whakahaere e tika ana'.

E matapaetia ana hei te marama o Pipiri ora ai anō a Novopay.

Kairīpoata: Heeni Brown.