Kaupapa: Politics

Kāore ano kia tau te mamae o ngā urutomo ki Rūātoki

He take e kore e taea te mawehe i te whakataunga o ngā nawe a Ngai Tuhoe me te Karauna, ko ngā mahi urutomo ki Ruatoki i te tau rua mano ma whitu.

Kua ono tau inaianei no te urutomonga, i tera wiki noa te huringa tau, heoi, ahakoa te roa o te wā, kei te tārewa tonu te take. Ā ko te pūrongo a te Kāhui Tika Tangata tera e taria ana e Ngai Tuhoe. 

I tono uiui matou i te Kāhui Tika Tangata engari auare ake. kaore hoki kia toka i a ia he rā e whakapuakitia ai te purongo. Kua roa te Kahui Tika Tangata e mea ana ka puta tana ripoata whai muri i te puakanga o te purongo a te mana whanonga pirihimana.

Kua rima marama inaianei no taua wā. ā. ahakoa ana hui me Ngāi Tuhoe i muri tata mai, kei te tatari tonu.

Mai i konei ka tukuna te kawenata whakatau a Ngai Tuhoe ki te komiti whiriwhiri Māori hei `ata wherawhera ma te iwi whānui. E ai ki a Tamati Kruger e kore e kore ka puta ētahi amuamu i te hunga whakahē, engari karekau ia i te maharahara.