Kaupapa: Politics

Ka tuki rae ki te rae a Turei rāua ko Parata

E takahi ana a Metiria Turei i te ara o Tūmatauenga, ā, ko Hekia Parata kei te keo o tana pū.

Mea rawa ake tana karanga ki te Minita kia Parata ki te rīhaina, ko te take e ai kia Turei nā te mea he koretake kē āna mahi hei Minita Matauranga.

Ko tā Turei te kaiwero hou i te Minita, e ngana ana ia ki te tū rae ki te rae kia Parata ki roto i te whare o ngā raiona.

Heoi mēna he āwangawanga ta Parata kia tera, kare ia mo te paku whakatau atu na tana whakahoki ki taua wero, mena koira tana hiahia kei i a ia tera.

Ehara hoki i te mea karekau he kai ma tana ahi. Kua whakapuakitia i te rangi nei he rima miriona taara ka hau atu ki te whakatika i te kaupapa Novopay, mo nga utunga kaiako o te motu. Ahakoa tena, e ai ki te Minita whakatika, e kore e tatū nga raru i kona.

Ko tā Steven Joyce kō atu i te rua ira rima miriona tāra te pūtea kua whakapouhia kē mo taua take, inā he rima miriona te nui kua whakatahangia hei whakatika i ngā raru o taua kaupapa.

Inā te whakahoki a Turei ki tera he pūtea tera ka taea te whāngai i ngā tamariki o te motu e noho mate kai ana i tenei wā.

I te ata nei i tohua e Joyce te Tari Matauranga te tuku tūpato atu kia Talent 2  mo tā rātou kore tutuki i ngā oati o tā rātou kirimana, heoi ko tāna e whakapono ana e kore kē e oti ai ngā raru i reira, mo te wā roa hoki.

Kairīpoata; Maiki Sherman.