Ngā kaupapa: Elections, Politics

Ka titiro whakamua ngā mema pāremata Māori hōu hakoa ngā raru ā-pāti

Heeni Brown

Kua hoki mai a Reipa ki Pāremata, engari te āhua nei ka turakina kē tō rātou rangatira.

Ahakoa e tāmia ana te rōpū e ngā raruraru, e anga ana ēnei mema hōu o Reipa ki ngā rā kei mua i a rāua.

Hei tā Adrian Rurawhe, “Ko tōku nei tūmanako kia mahia ngā mahi kei waenganui i aku iwi, aku hapū, aku whānau katoa o te Tai Hauāuru.”

E ai ki a Peeni Henare, “He mīharo te kitenga atu i te hītori ki roto i te wāhi nei, āna ko ngā whakaahua o tōku tupuna a Tau Henare me te maha o ōku mātua, me ōku whāea i uru mai, nā reira he whānui ngā tapuwae.”

Kua hoki mai a Pita Paraone o Aotearoa Tuatahi, ā, he kōrero tohutohu āna ki ēnei kanohi hōu.

Hei tā Pita Paraone, “Kaua e wareware nō hea rātou, kaua e wareware ki te hoki atu ki te hau kāinga kia whiriwhiringia ki ngā tāngata e noho tonu ana ki te wā kāinga, whakarongo ki a rātou, kaua e wareware ki tēnā.”

Mō Tākuta Shane Reti, tētahi o ngā mema Māori tokoiwa kei te rārangi ingoa o Nahinara, e pakari ana ōna mema, ā, he haepapa e ai ki a Reti, te aro pū ki ngā take Māori.

I te tōnuitanga o Nāhinara, ka roroku ko te kaha o Reipa, ā, mā te whakatikatika rā anō pea i tōna tāhūhū e mana anō ai te whare o Reipa.