Ngā kaupapa: Education, Politics

Ka pōwhiringa Te Taiurungi hōu a Te Ururoa Flavell e TWOA

Mānia Clarke

He taki hōu mā te kaitōrangapū o mua mā Te Ururoa Flavell. Ko te uri o Rangiwewehi me tōna iwi i whakaeke atu ki Te Tari Matua o Te Whare Wānanga o Aotearoa hei Taiurungi hōu mo te whare wānanga nunui tuarua o te motu me ngā tauira e toru tekau ma rua mano te nui.

Te tini ngerongero o te tangata e taunaki ana i te kaitōrangapū o mua i tana pōwhiri.

E rere ana ngā whakamānawa a ngōna hoa o Te Pāti Māori me ngā whanaunga anō hoki.

“E noho nei te whakaiti nā runga i te āhuatanga o ngā kōrero i puta nō ngā hoa o roto i te whare pāremata, nō ngā hoa o te Pāti Māori, nō ngā whanaunga,” i mea atu a Flavell.

Ko Rongo Wetere te tumuaki tuatahi, nā rāua ko Boy Mangu Te Wānanga o Aotearoa i whakatū.

Nā Bentham Ōhia tana tūranga i whakakapi hei Pouhaere ā, ināianei mā Flavell te pūtu o te taiurungi o mua a Jim Mather e whakakī.

“Mā tana arataki i a mātou ka eke panuku ō mātou tumanako ā mātou tauira, mā roto i tana whakamahi i wana pūkenga i riro i a ia e mahi ana i roto i te ao mātauranga i mua noa atu i tana haere ki roto i te ao tōrangapū,” i kī atu te Poutiaki Tikanga o TWOA a Paraone Gloyne.

Hei tā Gloyne anō, he amorangi ki mua, he hapai ō hoki tōna momo.

“Ko te kitea a Te Ururoa. Kei te mōhio whānuitia Te Ururoa, ka tahi,” i kōrero atu ia, “ka rua, he tangata titaura a Te Ururoa, he tangata mōhio ki te horoi rīhi.”

Ka kōrero atu a Flavell ki ngā kaimahi rātou ko ngā tauira hei mua i tana whakarite rautaki anga whakamua mō te tau hōu.