Kaupapa: Politics

Ka poroporoakitia a Tariana raua ko Pita e pāremata

Kua mea ake a Tariana Turia, mēnā kāore tētahi o ngā kaitono wāhine o te Pāti Māori e uru ki te Whare, ka pai tonu ki a ia kia noho tonu hei kaiārahi takirua i te pāti. Inapō i whakarauika atu ētahi whanaunga me ētahi kaitautoko e rua rau ki Te Wharewaka i Te Whanganui a Tara ki te whakamihi i a Tariana rāua ki Pita Sharples.

He rehe te tokorua nei ki te kawe i ngā kaupapa uaua, ā kua takoto te mānuka ki ngā tauhou nei e whai ana i a rāua.

Muia ana te whare, ā heke ana ngā roimata i ngā kauhau whakamutunga a Tāriana rāua ko Pita. Engari he wairua katakata i rangona.

E ai ki ngā whanau o te tokorua nei, ahakoa ngā kōrero whakahē, kua aronui rāua ki ngā mahi mō te iwi Māori te painga.

Ahakoa kei te heke iho a Tāriana i tana tūnga hei mema tōrangapū, ka taea tonutia e ia te noho hei kaiārahi takirua mō te taha ki ngā wāhine ki te Pāti Māori.

Hei te marama o Whiringa ā Nuku ka tū te hui ā-tau a te Pāti Māori, hei reira whakatau ai ko wai ka noho hei kaiārahi i te Pāti.