Kaupapa: Elections

Ka kore te pāti Reipa e mahi ngātahi ki te Pāti Māori

Te Kāea

Whai muri i te whakatau a Reipa, ka kore ia e mahi ngātahi ki te Pāti Māori i tētahi rūnanga kāwanatanga, ko tā Reipa i te rangi nei, he āta whakamārama atu, kaore rawa rātou mō te whakakore i ngā ara whakawhiti kōrero ki te rōpū tōrangapū Māori.

Heoi e ai ki a Reipa, he mema Māori taikākā tonu ō rātou i ana kaitono Māori tekau mā whā.

He papaki ringa, he harirū te mahi i Pā Harakeke i te rangi nei, ā, ko aua mahi tonu rā mō David Cunliffe, kua mea nei ka tāea e rātou te kōrero ki te Pāti Māori.

E hiahia ana te nuinga o ngā rohe pōti Māori kia moe tahi a Reipa me te Pāti Māori engari, kei te hiahia kē a Reipa ki te mahi ngātahi ki a Aotearoa Tuatahi me ngā Kākariki.

Ahakoa i karo a David i ngā pātai mō te rata o ngā Kākariki ki a Nāhinara, ko tā ngā Kākariki he tuku i ēnā kōrero kia moe.

Hei tā Te Ururoa Flavell o te Pāti Māori, “Kua oti kē i a mātou te korero. Kahore he raruraru o te mahere rautaki ki ētahi atu, ko tōna mutunga he māmā noa iho te kōrero te noho tahi ki ētahi atu rōpu.”

Ahakoa tā Reipa minamina ki te pōti Māori, kei te āhua o ngā hua o te pō kōwhiri te kupu whakamutunga, ko wai ka moe i a wai.