Kaupapa: Politics

Ka hoko hea ngā Iwi Māori ?

Kātahi anō a Donna Hall kā hui me te Manatu Ture mō te pūtea āwhina i ngā nama roia mō te tono wai a te Kaunihera Māori.

Āe marika kāore anō te pakanga nei kia oti.  Engari kē hei tā Donna Hall kua whai niho te Taraipiunara nā te whakatau a te Kōti Tiketike.

Engari, he wā anō tērā mō te Kāwanatanga.  Inaianei ko te hoko i āna rawa te aronga nui, ā ko te whakararata i ngā iwi tērā.

I raro i ngā whakaritenga hea mō Mighty River Power. 

He rima ōrau e wātea ana ki ngā iwi kāore e whai pānga ana ki te kamupene.  He tekau ōrau ki ngā iwi kei tōna rohe, ā, he tekau mā rua ira rima ōrau mēna kua whakaritea kētia he whakāetanga me te kamupene.

Katoa ngā papuni hiko a Mighty River Power kei ngā pari o te awa ō Waikato.  I kōrero a waea a Te Kāea ki te toihau o te ringa pakihi o Waikato Tainui, ara ki a Mike Pohio, hei tāna karekau rātou mō te hoko hea. 

Mō ngā iwi kāore ano kia whakatauria ā rātou kereme, kua whakarite huarahi motuhake te Kāwanatanga mā rātou.  Arā, ka tukuna he hea mā te tango i tētahi ōrau ina tatū ai te whakataunga.

Ko Ngāpuhi tētahi e whakaaroaro ana, ko tā te heamana o te Rūnanga ko Sonny Tau  “i tenei wa e titiro au ana mātou mehemea koia tērā ko te wāhi tika hei whakapau ngā moni a Ngāpuhi kāore rānei heoi anō, koia mātou e hui ana i tēnei rā.”

Ki ētahi atu iwi, kāore a Ngāti Toa mō te hoko hea, hei tā Te Arawa ka rēhita rātou engari e whakāro tonu ana.  Kua tāpui pūtea a Ngati Raukawa engari kei te wānanga tonu.  Hei tā Ngāti Tūwharetoa kei te tatari ki ngā whakamarama.  Kaati ko te whakatūpato a te Kaunihera Māori, me mataara, ā, e wawatatia ana, hei te marama o Pipiri ka hoki ratou ki te aroaro o te Taraipiunara.