Ka heke a Shane Jones i tōna tūranga tōrangapū

Te Kāea

Ka heke te mema pāremata o Reipa, a Shane Jones i tōna tūranga hei kaitōrangapū, ā, e whakapaetia ana ka wehe atu a ia i Te Rōpū Reipa hei te paunga o te marama o Mei.

Kei te kii ake rā ia, kua whakamōhiotia kētia te kaiarahi o Te Rōpū Reipa, a David Cunliffe me te perehetini o te pāti, a Moira Coatsworth mō tōna whakatau kia whakawāteahia mai ai tōna tūru tōrangapū mō te kaitono ō-mua mō Te Tai Tokerau o Reipa, mō Kelvin Davis.

E ai ki ngā kōrero kua puta i a TV3, kua uru atu a Shane Jones ki tētahi tūranga mahi hōu, e kiia nei, Pacific Economic Ambassador, he tūranga mahi kua hangaia mōna e te kāwanatanga Nahinara.

I timatahia tana hikoi i te huarahi tōrangapū i te pōtitanga matua i 2005, hei kaitono mā Te Rōpū Reipa.

Ka mutu, kua rongo mārika te ika-ā-whiro nei i ngā heke o ēnei tūmomo mahi, whai muri iho i tana tuku mai i whakamahi kino nei i tētahi kāri pūtea Kāwanatanga i 2010, ā, i hokona e ia ētahi kiriata karihika i te hōtērā.

I tae atu anō ia ki te pae o te riri mō āna pānga ki te whai uruwhenua o tētahi kaipakihi Hainamana nei, o William Yan, mōna kua hāmenetia mō ōna whakapuakitanga i runga i te hē. I te marama o Mei, i 2012, i puta hara kore mai a Yan i ngā whakapae ki a ia.

He nui ngā raru ki uta, ā, he nui hoki ngā raru ki tai kia Shane Jones i roto i āna mahi mō Te Rōpū Reipa, ā, kua tū takotako a ia i roto i te wā.

Hei te wā tītoki rā anō a Te Kāea whakapāhotia atu ai te roanga ake o ngā kōrero.