Ngā kaupapa: Education, Politics

Kā haere tonu a Novopay, kāore rānei ?

Ka riro mā Minita Steven Joyce ngā hua e tuku āpōpō, heoi, ki tētahi tumuaki i uiuitia ē mātou, kua roa rawa ēra e tāria ana.

He marama pōnānā ngā marama e ono kua taha ake nei, ā i te kitenga o tētahi raru anō i Novopay, nāwai i hē kātahi ka hē kē atu.

Ko tā tētahi tumuaki ko Moarikura Sandy Johnson, “he tino taumaha mō ngā kaimahi, he raru nui ki te kainga ki te utu mo te taha kai, te rēhi mo te whare ēra ahuatanga katoa.”

Kua nui ngā raru Novopay ki te Te Kura Kaupapa Māori o Ngā Mokopuna, ā na te kura tonu i utu i ngā kaiako i te korenga o Novopay e utu tika.

Ko tā Johnson anō, “he raru nui tēra ki te taha whakahaere, nā te mea ka whakapau te pūtea, kāre he pūtea mō te hoko rauemi, mō ā tātou tamariki.”

Hei āpōpō ka whakaputa a Minita Steven Joyce i ngā kōrero e pā ana ki a Novopay, ā ko tā te maha noa o ngā kaiako, me tere te whakatika, nā te mea ko te whakapae, kua koretake ngā kaiāwhina Novopay.

Kua raru ngā kaiako tokomaha puta noa i te motu i a Novopay, heoi he wero tā Jones ki te Kāwanatanga, kia whakamāmā ngā taimahatanga kei runga i a rātou.

Ko tāna, “me whai aroha te Kāwanatanga i ngā kaiako, ngā kaimahi puta noa i te motu, nā te mea i te kore rātou e noho ora ana nā kā tino raru ngā tamariki.”

Heoi, ka noho āmaimai ngā kaiako tokomaha puta noa i te motu, ā kāre e kore ko ngā whakatau kā puta ka pā kau atu ki a rātou.

Kairīpoata: Ripeka Timutimu.