Ka aukatingia te reo Māori i ētahi wahanga o ngā kooti

Kua puta he whakataunga i te Kooti Teitei, kahore e whakaae ana ki ngā tika a tētahi roia Māori kia uiui i te hunga kite mata i roto i te reo Māori. Hei tā taua roia tonu, i te karawhiunga o āna pātai, i reira ngā kaiwhakamāori mō te nohonga i tū ki mua i te Taraipiunara, engari, ko te whakatau kē a te Tiati, horekau he wā e tika ana kia whakahaere tika i aua whakahaerenga mō ērā tūāhuatanga.

Nā Liane Green te tono i kawe atu ki te Kooti Teitei, kia arotakehia te whakatau a Te Rōpū Whakamana i Te Tiriti o Waitangi, i kīa ai, kāre i āhei te roia o Green ki te tuku pātai reo Māori ki ētahi kaituku kōrero e kūare ana ki te reo. Hei tā Green, i hē tērā whakatau a Te Rōpū Whakamana, i raro i te Ture Reo Maori 1987.

He kaikerēme Tiriti a Green nō ngā hapū o Ngāti Peehi, o Ngāti Te Kanawa anō hoki. E ai ki tana roia, a Alex Hope, ko te take i kōkirihia ngā uiuinga i roto i te reo Māori, he whakamātau i ngā kaihītori tokorua, i waihanga i tātahi ripoata e pā ana ki ngā kaupapa tōrangapū o Te Rohe Pōtae.

Ko te whakataunga a te Tiati o Te Rōpū Whakamana

1) Kia tuku tono atu a Hope kia wātea ai ia ki te uiui i roto i te reo Māori

2) Kāre ngā kaikōrero i mōhio ki te reo, kāre hoki i mārama mēnā ka āwhina ngā uiuinga reo māori i te māramatanga a te Taraipiunara ki ngā kōrero

3) ki te whakaae kia uiuia i roto i te reo, ka taumaha ake ngā whakahaere o te uiuinga, ka roa ake hoki te whakawātanga

Hei tā Kaiwhakawā MacKenzie o Te Kooti Teitei, kīhai te whakatau a Te Taraipiunara i whakahēngia tā te mea, he poto kē te wā ki āna āpiha, ā, he taonga anō te wā.

Ko Te Taura Whiri i Te Reo Māori tērā i tū hei kaiwawao,

Hei tā te Heamana, a Erima Henare, he hinganga nui te whakataunga mō Te Reo Māori, tā te mea, ka kitea pea te memehatanga o te tū a te Reo ki roto i te ture.

E whakaaro ana te hunga kawe i te take nei, kia piirahia te whakataunga a te Kooti Teitei.