Kaupapa: Politics

Ka āta wetewete te kāhui Māori o Reipa i ō rātou tūranga hōu

E ai ki tētahi o ngā mema pāremata Māori o Reipa, he uaua ake mā rātou te piki tūranga i te rārangi a te rōpū nā te hāngai o te aro ki a rātou kaipōti Māori me āna take motuhake. 

Nō te rangi nei whai wāhi tuatahi atu ngā mema o Reipa ki te āta wetewete i a rātou tūranga hōu, ā, i tae ake tā mātou karere take tōrangapū a Maiki Sherman ki te hui a te kāhui Māori.

He wai Māori hei tōhi i te kakenga o te aka tātaramoa, tūturu he hakari kei te haere e ai ki ngā mema Māori o te Rōpū Reipa.

Ko Louisa Wall tērā kua tino whai niho, mai i te tūranga toru tekau mā tahi, ki te tūranga tekau mā ono.  E whakaae ana ia nā tana Pire Mārena Takatāpui i whai hua ai. 

E rua ngā pikinga taumata mo Shane Jones ki te tūru tuarima.  He pērā hoki mō Nanaia Mahuta ki te tūranga tuaiwa.  Kua riro i a ia te rāngai Whakawhanake Whakataunga Tiriti.  Ehara i te mahi tauhou nā tana noho ki te poari arotake a Waikato-Tainui.

Ko Moana Mackey kua riro i te tūru tekau ma waru.  Heoi, mō ngā tauhou a Rino Tirikatene rāua ko Meka Whaitiri, he apataki tonu te mahi.

Heoi, e ai ki a Rino Tirikatene he uaua ake te ara whakarunga mā ngā mema pāremata Māori.   

E ai ki a Meka Whaitiri ko te pire nui a Louisa Wall pea te tauira. 

Āe mārika ko taua kōrero anō rā e ai ki te Rōpū Reipa, he tira hōu tēnei te haramai nei.