Kaupapa: Business

Ka arotakengia te Federation of Māori Authorities

Traci Houpapa - Photo / File

Ka arotakengia te Federation of Māori Authorities whai muri i te tūwhene tōna toru rau mano tāra i te tau kua pahure ake nei.

I kōrero tā mātou kaikawe kōrero, a Ripeka Timutimu ki a te tumu whakarae a FOMA, a Traci Houpapa, ki Tāmaki Makaurau, me tōna kī kua kaha te tautoko i ngā mema i a ia e anga whakamua ana.

Ko ia te tumu whakarae o tētahi ūmanga e whai hononga ana ki ngā kamupene miriona tāra te wariu, engari kua whai ringa āwhina a ia i tēnei wā taumaha.

Kua whai mōhiotanga a Te Kāea, i tērā tau e toru rau rima tekau mano tāra te tūwhene i taka ki runga i a FOMA.

E ai ki a Traci nā ngā mahi ki rō kōti ki te Kaunihera Māori, me ngā mahi arotake a te ture whenua Māori, i taka ai rātou ki te hē.

I tēnei marama i tuku a FOMA i tētahi pānui ki ngā mema ki te whakamahū i ngā āwangawanga, ahakoa kua kitea kē ngā raruraru, ā, kua whakaae anō ngā mema kia arotakehia a FOMA.

Kāre e kore ka ara ake tēnei take ki te hui a tau o FOMA ka tū ki Te Whanganui ā Tara hei ngā marama e tū mai nei.