Iwi leaders back covenant for Children

updated

Kei te karanga ngā māngai ā-iwi kia tautoko atu te kāwanatanga i tētahi kawenata motuhake hei tiaki i te mana o ngā tamariki ki Aotearoa nei. E ai ki a Te Waihoroi Shortland o Ngāti Hine, e huri tuarā ana te kāwanatanga ki tā rātou tono.

He kino rawa te matenga o Moko Rangitoheriri nā ngā ringaringa o ōna kaitaurima. E ai ki a Te Waihoroi Shortland, mā tetahi kawenata tamariki ka haumarutia etahi atu.

“He kawenata tēnei me pēhea tatou e kore i ngā tika i ngā hiahia o a tatou mokopuna, koira te pakanga nui a te ao Māori.”

I tōna tikanga i whakatakoto te tono kawenata tamariki i mua i te Pirimia a John Key, rātou ko te Minita Take Whakahiato Ora a Anne Tolley, me te Minita Take Tiriti a Chris Finlayson.

Hei tā Shortland, “Kahore te kawanatanga i te aronui ki te kawenata nei. Taku whakapae kei te waihanga ia i tetahi ara ou mo ana tikanga tamariki e rongo ana tatou, engari kua kore ia e hiahia e tahaengia te mana o te tiaki tamarika i nga kaupapa e whiriwhiri ana ia, kua huri tuara ia ki tenei.”

Koinei ngā kanohi mo te tūkino tamariki, heoi e whakapono ana a Ahorangi, Makere Mutu, kaore te kāwanatanga e whakaaro nui ana ki ēnei tamariki.

“Ko tenei kawanatanga mot e whai rawa, kaua e mahara ki nga tamariki, ko ratou nga tamariki o te hunga pohara, ehara no matou te kawanatanga<’ hei tā Ahorangi Mutu.

“I tera wiki tata ano he mokopuna tera e ngaro, e mohio ana au i te mamae i te hora o te whakama, i te patu o te peehitanga ki runga i te whanuitanga o te ao maori na te mea ka pa tetahi mea pera ki runga i te mokopuna ka pa ki a tatou katoa, ka pa ki tetahi mokopuna pakeha, ka pa ki tona whanau anake”, hei tā Shortland.

I whakapā atu a Te Kaea ki te Minita Take Whakahiato Ora a Anne Tolley mō tēnei take heoi e whanga tonu ana mo te whakautu.